Foto: Qaraǵandy oblysy ákiminiń baspasóz qyzmeti
"ArselorMittal Temirtaý" menshik iesiniń aýysýy qyzmetkerler aldyndaǵy mindettemelerdi oryndaýǵa esh áser etpeidi. Tólem sharttary, áleýmettik kepildikter saqtalady. Shahtalarda birinshi kezekte eńbek qaýipsizdigin arttyrýǵa nazar aýdarylady. Bul týraly Vadim Basin málimdedi, dep habarlaidy "Ult aqparat" Qaraǵandy oblysy ákimdiginiń baspasóz qyzmetine silteme jasap.
"Keshe Memleket basshysy qaza tapqan jáne zardap shekken kenshilerdiń týystarymen kezdesýde kompaniianyń problemalyq aktivterine qatysty investormen qarym-qatynas toqtatylatynyn málimdedi. Bul rette bir jait erekshe atap ótildi jáne de kompaniianyń búkil ujymyna birden aita ketilgeni: jumys sharttarynda, tólemderde, áleýmettik kepildikterde eshqandai ózgerister bolmaidy. Olardy jaqsartý turǵysynan ǵana qaita qaralatyn jaǵdailar qalady. Bul kompaniianyń ári qarai jumys isteýi jáne áleýmettik jaýapty bolýy úshin qajetti shart. Ujymnyń birde-bir múshesi jumystan shyǵarylmaidy, ujymnyń birde-bir múshesiniń quqyǵy tómendetilmeidi", – dep atap ótti Vadim Basin.
Shahtalarda birinshi kezekte eńbek qaýipsizdigin arttyrý jáne negizgi qorlardy jańartý jumystary júrgiziledi.
Qazir qaza tapqan kenshilerdiń týystary men jaqyndaryna psihologiialyq kómek kórsetilip, olarmen kásibi psihologtar jumys istep jatyr.
Jedel jeli jumys istep tur: Qaraǵandyda (8-7212) 51-72-23 (TJD), (8-7212) 49-72-70 ("ArselorMittal Temirtaý") jáne Astanada – (8-7172) 70-41-08.
