Arnaiy komissiia Almaty qalasyndaǵy balabaqshalardyń jumysyn tekseredi. Komissiia quramyna bilim berý salasyndaǵy sapany qamtamasyz etý departamentiniń ókilderi, sarapshylar, ádiskerler men qoǵam belsendileri kiredi. Bul jumys elimizdiń basqa óńirlerinde de júrgiziledi, dep habarlaidy QazAqparat Bilim jáne ǵylym ministrligine silteme jasap.
Vedomstvonyń málimetinshe, komissiia músheleri mektepke deiingi uiymdardaǵy jaǵdai men balabaqsha qyzmetkerleri jumysynyń sapa standarttaryna sáikestigin tekseredi.
«Balabaqshalar 100% qaýipsiz bolý kerek. Osy kúnderi Almatydaǵy eki mektepke deiingi uiymda oryn alǵan oqiǵalarǵa jol berýge bolmaidy. Balabaqshalar ákimdikterdiń qaramaǵynda. Sonymen qatar zań buzýshylyqtardyń basym kópshiligi jekemenshik balabaqshalarda tirkeledi. Biraq qaýipsizdikti menshik nysany men baǵynystylyǵyna qaramastan qamtamasyz etý qajet. Ókinishke orai, osy jyldyń qyrkúiegine deiin mektepke deiingi uiymdardyń sapasyn memlekettik baqylaý tetikteri múldem bolǵan emes», – dep atap ótti Bilim jáne ǵylym salasynda sapany qamtamsyz etý komitetiniń tóraiymy Gúlzat Kóbenova.
Onyń aitýynsha, balabaqshalar basqa bilim berý uiymdaryna qaraǵanda, litsenziialaýdan bosatylyp, habarlama arqyly ashylǵan. Sonymen qatar buryn memlekettik baqylaý men attestattaýdan bosatyldy.
«Tek biyl ǵana biz balabaqshalarǵa memlekettik tekserý institýtyn zańdy túrde engize aldyq. Osyǵan bailanysty kóptegen narazylyq boldy. Biraq balalardyń máselesine kelgende, bei-jai qaramaý kerek. Alǵashqy nátijeler mundai tekserýdiń qajettiligin kórsetti. Jeltoqsan aiynyń basynda biz teksergen balabaqshalardyń shamamen 80%-y bilim berý qyzmetine qoiylatyn talaptarǵa sáikes kelmeýine bailanysty memlekettik attestattaýdan ótpegenin habarladyq. Sondyqtan biz baqylaý quralyn engizdik», - dedi ótti Bilim jáne ǵylym salasynda sapany qamtamsyz etý komitetiniń tóraiymy.
Gúlzat Kóbenovanyń aitýynsha, memlekettik tapsyrysty jeke menshik balabaqshalarda ornalastyrýǵa, tárbieshilerdiń biliktiligine jáne qaýipsizdik máselelerine qoiylatyn talaptar kúsheitilmek.
«Sonymen qatar mektepter men balabaqshalarda pedagogikalyq jumysqa alǵash kiretinderdiń biliktiligin táýelsiz tekserý týraly talap engiziledi.
Balabaqshalar zańdy ákimdikterdiń qaraýynda ekenin eskere otyryp, biz mektepke deiingi uiymdardyń jumysyn erekshe baqylaýǵa alý qajettigin birneshe ret atap óttik. Ár topqa beinekameralar berilýi kerek. Balalarmen jumys isteitin kadrlardy irikteý máselesi de óte mańyzdy», - dedi ol.
