Arnaýly zań jobasy aiasynda jeltoqsandyqtardyń máseleleri talqylanady. Bul jaiynda Májilis depýtattarynyń saýalyna QR Premer-Ministriniń orynbasary Eraly Toǵjanovtyń jaýabynda aitylǵan, dep habarlaidy QazAqparat.
«Saiasi qýǵyn-súrgin qurbandaryn tolyq aqtaý jónindegi memlekettik komissiianyń jumys jospary aiasynda arnaýly zań jobasyn ázirleý kózdelgeni belgili. Osy zań jobasyn ázirleý barysynda Jeltoqsan oqiǵasyna qatysýshylar máseleleri de talqylanatyn bolady», - delingen Eraly Toǵjanovtyń jaýabynda.
Onyń atap ótýinshe, saiasi qýǵyn-súrgin qurbandary retinde tanylǵan azamattardy áleýmettik qoldaý sharalary «Jappai saiasi qýǵyn-súrginder qurbandaryn aqtaý týraly» QR Zańynda aiqyndalǵan. Osy Zańda aqtalǵan azamattardyń qamaýda bolǵan ár aiy úshin birjolǵy aqshalai ótemaqy tóleý belgilengen. Jergilikti ákimdikter biýdjet múmkindikterine qarai Jeltoqsan qatysýshylaryna Táýelsizdik kúnine orai jyl saiyn birjolǵy materialdyq kómek kórsetedi.
«Bul úrdis biyl da óz jalǵasyn tabady. Sonymen qatar, jeltoqsan oqiǵasyna qatysýshylardy áleýmettik qoldaý, qoǵamdyq-saiasi is-sharalarǵa keńinen tartý, Táýelsizdiktiń 30 jyldyǵyna orai merekelik medaldarmen marapattaý jumystary uiymdastyrylýda. Jalpy Jeltoqsan qaharmandarynyń azamattyq erligin josparly túrde nasihattaý, olardy áleýmettik qoldaý máseleleri boiynsha jumystar júrgizilýde jáne Úkimettiń turaqty baqylaýynda», - delingen jaýapta.
