Armeniiaǵa koronavirýs infektsiiasyna qarsy vaktsinanyń partiiasy kelgeli jatyr. Sonyń izinshe osy jyldyń naýryz aiynda halyqty kezeń-kezeńimen vaktsinalaý bastalady.
Armeniianyń densaýlyq saqtaý ministri Anahit Avanesian jýrnalisterge bergen suhbatynda osylai dep málimdedi, dep habarlaidy «QazAqparat» HAA menshikti tilshisi.
Anahit Avanesian Armeniia biligi elge COVID-19 indetine qarsy vaktsinany jetkizý jónindegi kelissózderdi aiaqtaǵanyn málimdedi.
Onyń aitýynsha, vaktsina jetkiziletin naqty aqparat belgili bolǵannan keiin bólim vaktsinalaý kestesin jariialaidy.
«Bizdiń saraptamalyq top bizge usynylǵan barlyq vaktsinany tekserip, baǵalap jatyr. Mamandarymyz reseilik «Sputnik V» vaktsinasyn qoldanýǵa ruqsat berdi. Jaqyn arada reseilik vaktsinanyń naqty qashan jetkiziletini belgili bolady. Biz qazirdiń ózinde naýryz aiynda halyqty kezeń-kezeńimen vaktsinalaýǵa múmkindik beretin vaktsinalardyń alǵashqy partiiasyna ie bolamyz dep senemiz», - dedi Armeniianyń densaýlyq saqtaý ministri.
Ministrdiń aitýynsha, qaýip tobyna jatatyn adamdarǵa basymdyq beriledi. Bul toptar qazirdiń ózinde anyqtalyp qoiǵan. Armeniianyń Densaýlyq saqtaý ministrliginiń málimetteri boiynsha birinshi kezeńde qarttar úiindegi adamdar, osy ortalyqtardyń qyzmetkerleri, meditsina qyzmetkerleri, áleýmettik kómek ortalyqtarynyń qyzmetkerleri, 65-ten asqan adamdar jáne 16-dan 64 jasqa deiingi sozylmaly aýrýlary bar adamdarǵa vaktsina salynady.
Armenpress basylymynyń habarlaýynsha, Armeniia COVAX bastamasymen yntymaqtastyq aiasynda vaktsinany britandyq «Astra Zeneca» kompaniiasynan da satyp almaq.
Armeniia Densaýlyq saqtaý ministrligi Aýrýlardy baqylaý jáne aldyn alý ulttyq ortalyǵynyń málimeti boiynsha, 2021 jyldyń 4 aqpanyna deiin Armeniiada koronavirýs infektsiiasyn 167 568 adam juqtyrǵan. 159 045 naýqas saýyǵyp, 4 637 naýqas emdelýde. 3 107 adam qaitys boldy.
