Armeniia Jerge jaqyn orbitaǵa alǵashqy ǵarysh spýtnigin ushyrdy. Bul týraly Armeniianyń úkimet otyrysynda eldiń premer-ministri Nikol Pashinian málimdedi, dep habarlaidy QazAqparat.
Spýtnikten túsirilgen sýretter shekaradaǵy baqylaý, tótenshe jaǵdailardyń aldyn alý, qorshaǵan ortany qorǵaý, qala jáne jol qurylys, taǵy basqa salalarda qoldanylmaq. Armeniianyń «Geokosmos» AQ men ispandyq «Satlantis» kompaniiasynyń yntymaqtastyǵy nátijesinde 25 mamyrda SpaceX kemesi arqyly Jerge jaqyn orbitaǵa Armeniianyń birinshi ǵarysh serigi ushyryldy.
«2022 jylǵy 25 mamyrda Erevan ýaqytymen saǵat 22.35-te AQSh-tyń Kanaveral múiisindegi ǵarysh ortalyǵynan SpaceX ǵarysh kemesi arqyly Armeniianyń birinshi ǵarysh serigi ushyryldy. Armeniia ǵaryshtyq qyzmeti dáýirine qadam basty. Biz ǵaryshty zertteý jáne óndirý salasyndaǵy bai dástúrlerimizdiń qalpyna keletinine úmittenemiz», - dedi premer-ministr Nikol Pashinian.
Ol sondai-aq Armeniiada 2023 jyldyń sońyna deiin spýtniktik basqarý ortalyǵy men qabyldaý stantsiiasy qurylatynyn atap ótti.
