Argentinada Abai atyndaǵy kóshe men «Qazaqstan Respýblikasy» alańy ashyldy, dep habarlaidy QazAqparat QR Syrtqy ister ministrligine silteme jasap.
Qazaqstan Táýelsizdiginiń 30 jyldyǵyn merekeleý sheńberinde qazaq aqyny, oishyly jáne ulttyq ádebiettiń negizin qalaýshy Abai Qunanbaiuly atyndaǵy kósheniń, sondai-aq Rosario qalasynda «Qazaqstan Respýblikasy» alańynyń resmi ashylý rásimi ótti. Oǵan Qazaqstannyń Braziliiadaǵy Elshisi jáne Argentinada qosa atqarýshy Bolat Núsipov qatysty.
Elshi Bolat Núsipov el basshylyǵynyń ulttyq sana-sezimdi, ózindik mádeni kodty saqtaý jáne mádeni jetistikterdi, onyń ishinde shetelde ilgeriletý jónindegi bastamalaryn iske asyrýdyń mańyzdylyǵyn aitty. Sonymen qatar Qazaqstan Prezidenti Qasym-Jomart Toqaevtyń «Abai jáne HHI ǵasyrdaǵy Qazaqstan» jáne «Abai – rýhani reformator» maqalalary aiasynda Abaidyń qazaq mádenietin damytýdaǵy róli men onyń murasynyń qazirgi qoǵam úshin mańyzdylyǵy erekshe atap ótildi.
Óz kezeginde, Qazaqstannyń Rosariodaǵy Qurmetti konsýly Gýstavo Gýtieres Qazaqstan halqynyń Abai tulǵasyna beretin zor mańyzyn aityp, Abaidyń álemdik mádeniet úshin Shekspir, Giote, Pýshkin nemese Moler siiaqty qundylyǵy bar ekenin jetkizdi. G.Gýtierestiń aitýynsha, Abai kóshesiniń ashylýy argentinalyqtarǵa qazaq halqynyń tarihy men salt-dástúrlerimen tanysýǵa qosymsha múmkindik beretin bolady.
«Is-sharalar 2019 jylǵy qarashada qol qoiylǵan memorandýmmen belgilengen Almaty men Rosario qalalary arasyndaǵy baýyrlastyq qatynastar sheńberinde ótti», - delingen QR SIM málimetinde.
