Memleket basshysy Qasym-Jomart Toqaev el basshylyǵynda qandai jumystardy qolǵa alatynyn aityp berdi, dep habarlaidy QazAqparat tilshisi.
«Sailaý kampaniiasy kezinde men elimizdiń birshama óńirlerin araladym. Meniń saiasi platformam - bizdiń azamattardyń basty talaptaryna jaýap bolady. Eń aldymen, men Qazaqstannyń úshinshi jańǵyrýy baǵytynda, Bes institýtsionaldyq reformany júzege asyrý men bizdiń memlekettiń basqa da strategiialyq mańyzdy jumystarymen ainalysamyn. Basqasha aitqanda, men Elbasynyń strategiiasyn júzege asyrý úshin jumys isteimin», - dedi Qasym-Jomart Toqaev.
Memleket basshysy óz sózinde memleket damýdyń jańa deńgeiine shyǵý úshin jańa amaldar men sheshimder kerektigin tilge tiek etti.
«Olardyń barlyǵy jaqynda jariialanady. Ekinshiden, óózekti áleýmettik máselelermen, barynsha muqtaj jandarǵa kómektesý isimen ainalysýdy kózdep otyrmyn. Úkimetke bul salada úzdik nátijege jetý amaldary tapsyryldy. Bizge áleýmettik saiasatty salmaqty túrde jańartý kerek. Úshinshiden, qazaqstandyq kásipkerlerge qoldaý bildiremin. Investitsiia tartý men olardy qorǵaý, iskerlik belsendilikti jigerlendirý, orta klasty qalyptastyrý kózdeledi. Tórtinshiden, meniń maqsatym - qoǵamnyń birligin qamtyp, árbir azamattyń quqyǵyn qorǵaý. Eń bastysy - árdaiym qaida bolmasyn Qazaqstannyń ulttyq múddesin qorǵaityn bolamyn», - dedi Prezident.
Sondai-aq, sybailas jemqorlyqty joiý máselesine toqtalǵan Prezident: "1 qyrkúiekke deiin jemqorlyqtyń deńgeiin meilinshe tómendetýge baǵyttalǵan reformalar toptamasy daiyndalady. Jemqorlyq - memlekettiń damýyn tejeitin kesel", - dep erekshe atap ótti.
"Bul qoǵamdaǵy ózara senimge, jalpy memleketimizdiń qaýipsizdigine qater tóndiretin qubylys. Sybailas jemqorlyqqa qarsy júieli jumys júrgizemiz», - dedi Memleket basshysy.
Aita keteiik, búgin Táýelsizdik saraiynda Qasym-Jomart Toqaev Qazaqstan halqyna ant berdi. Ant bergen sátten bastap jańadan sailanǵan Prezident resmi qyzmetine kirisken bolyp sanalady.
