Foto: Qýanysh Qojaev
Temirjolshylar kúni qarsańynda 95 jyldyq tarihy bar Aiagóz lokomotiv paidalaný deposynda ardager temirjolshylarǵa arnalǵan eskertkish taqta ashyldy.
Merekelik is-sharaǵa Aiagóz qalasynyń ákimdigi, depo ujymy men basshylyǵy, temirjol salasynyń ardagerleri, Astana, Almaty, Semei qalalarynan arnaiy shaqyrylǵan qurmetti qonaqtar qatysty. Jiyndy ashqan jergilikti temirjol ardageri Serik Akishev eskertkish taqta ashý ideiasy men onyń júzege asyrylýyna jáne ardagerlerdiń qysqasha ómirbaiany men eńbek joldaryna toqtalyp ótti.
Abai oblysyna belgili qoǵam qairatkeri Shymbolat Orazbaev (1934-2021) – Aiagóz deposynda 1959-1970 jyldary qarapaiym jumysshydan depo bastyǵyna deiin kóterilgen eńbek ardageri. Keiinnen Semei oblystyq partiia komitetiniń bólim meńgerýshisi, Semeidiń Kalinin aýdandyq partiia komitetiniń birinshi hatshysy, Semei qalasy atqarý komitetiniń tóraǵasy, Semei oblystyq partiia komitetiniń hatshysy, oblystyq kásipodaq uiymynyń tóraǵasy, Almaty temirjol basqarmasynyń qyzmetkeri siiaqty jaýapty laýazymdardy atqarǵan elge belgili azamat. Eren eńbegi baǵalanyp, «Eńbek Qyzyl Tý», «Qurmet belgisi» ordenderimen marapattalǵan, «Semei qalasynyń qurmetti azamaty» ataǵynyń iegeri.
Aiagóz deposynyń irgetasyn qalaǵan, Túrksibti salýǵa qatysqan ardager, «Lenin» ordeniniń iegeri Jaqsybek Aimaǵambetov (1913-1988) temir jolda 50 jyl eńbek etken. Ardager Jumaǵali Baltashev (1935-2012) «Halyqtar dostyǵy» ordenimen, birneshe medaldarmen marapattalǵan, Qurmetti temirjolshy, 43 jyl eńbek etken ardager. Qysqasy, qai-qaisysy da mundai qurmetke ábden laiyq tulǵalar.
Jiynda sóz alǵan Aiagóz qalasynyń ákimi Asqar Erlanov, Aiagóz temirjol toraby ardagerler keńesiniń tóraǵasy Tóken Kópbaev, Astanadan kelgen ardager-temirjolshy, kezinde osy depony basqarǵan Aspan Qajyǵulov ótken jyldardan estelikter shertip, atalǵan ardagerlerdiń temirjol salasyna sińirgen eńbekteri týraly sóz etti.
Aimaq temirjolynyń tarihynda Aiagóz lokomotiv paidalaný deposynyń orny airyqsha ekenin jetkizip, osynaý kásibi mamandar ustahanasynan shyńdalyp shyqqan dańqty temirjolshylardyń ómiri men elge sińirgen eńbekteri búgingi urpaqqa ónege kózi ekenin jetkizdi. Urpaqtar sabaqtastyǵy jalǵasýda.
Jalpy Aiagóz toraby kezinde kadrlar ustahanasy atalyp, Qazaqstan temir jolyna bilikti mamandar daiarlaýdyń mektebi bolǵany sóz boldy.
Eskertkish taqtany ornatýǵa jáne saltanatty jiyndy joǵary deńgeide ótkizýge tikelei atsalysqan depo ujymy men ardagerlerge, depo bastyǵy Almas Janatqaliev pen bas injeneri Asqar Sabyrbaevqa jinalǵan qaýym zor alǵys aitty. Ásirese eskertkish taqtasy ashylatyn ardagerlerdiń týystary Shákárim ýniversitetiniń professory Qumarbek Amirhanov, Ómirbek Aimaǵambetov, Meiramǵazy Baltashev is-sharany uiymdastyrýshylarǵa shyn júrekten alǵystaryn bildirip, jastarǵa úlgi-tárbie beretin osyndai jiyndardy aldaǵy ýaqytta da jalǵastyra berýge usynys jasady.
Sol kúni eskertkish taqtalary ashylǵan ardagerler rýhtaryna baǵyshtalyp as berildi.
