QR Premer-Ministriniń orynbasary Eraly Toǵjanov qazaqstandyqtardy koronavirýsqa qarsy vaktsina alýǵa shaqyrdy, dep habarlaidy QazAqparat.
«Azamattardyń densaýlyǵy men ómirin saqtaý - Úkimettiń basty mindetterdiń biri. Sondyqtan saqtyq is-sharalaryn ustanýǵa shaqyramyz. Virýs eshqaida ketken joq. Epidemiologiialyq jaǵdaidyń odan ary qalai ózgeretindigi ózimizge, árqaisymyzǵa, ár azamattyń jaýapkershiligine tikelei bailanysty ekendigin aitqym keledi. Ókinishke orai, biz kún saiyn koronavirýstyń saldarynan azamattarymyzdan aiyrylýdamyz. Ony da bilip otyrǵandaryńyz artyq bolmaidy. Eger halyqtyń basym bóligi vaktsinatsiiany ýaqytyly jasaǵan bolsa, onda bul jaǵdailardyń aldyn alýǵa bolatyndyǵyna eshqandai kúmán joq. Halqymyz: «Aýyryp em izdegenshe, aýyrmaityn jol izde» deidi. Osy jolmen júrý kerektigin 1 jyldyń ishinde oryn alǵan jait dáledep otyr», - dedi Úkimet basshysynyń orynbasary Ortalyq kommýnikatsiialar qyzmetindegi brifingte.
Onyń aitýynsha, vaktsina indetten saqtanýdyń negizgi joly. Odan basqa ázirshe álemde eshqandai jol joq.
«Sondyqtan osy vaktsinany alyp úlgermegen árbir azamat, qazaqstandyq tez arada vaktsina qabyldaýy kerek. Árqaisymyz qoǵam aldyndaǵy, otbasymyz ben kúndelikti aralasyp júrgen jaqyndarymyzdyń, áriptesterimizdiń, dostarymyzdyń aldyndaǵy azamattyq jaýapkershiligimizdi is júzinde kórsetetin ýaqyt jetti», - dedi Eraly Toǵjanov.
