«Nur Otan» partiiasynyń XVIII sezinde Memleket basshysy Nursultan Nazarbaev kópbalaly otbasylarda árbir balanyń járdemaqysyn 21 myń teńgege deiin arttyrýdy tapsyrǵan bolatyn. Al atalǵan tólemaqyny alatyndardyń ai saiynǵy tabysy bir adamǵa shaqqanda kúnkóris deńgeiiniń 70 protsentinen aspaýy tiis, dep habarlaidy QazAqparat tilshisi.
Aita ketken jón, búginde elimizde kúnkóristiń minimýmy 29 698 teńgeni quraidy. Osy ýaqytqa deiin ataýly kómekti bir adamǵa shaqqanda kúnkóris deńgeiiniń 50 protsentinen, iaǵni 14 849 teńgeden aspaityn otbasylar alsa, endi Prezidenttiń tapsyrmasy boiynsha atalǵan kórsetkish 70 protsentke - 20 789 teńgege deiin kóteriledi. Sonyń arqasynda kópbalaly otbasylardy áleýmettik kómekpen kóptep qamtýǵa bolady.
Ekonomist Saparbai Jubaevtyń aitýynsha, járdemaqynyń jańa túrin esepteý úshin aldymen otbasynyń bir ailyq jalaqysyn shyǵarý qajet. Sosyn ony otbasynyń barlyq múshelerine bólý kerek. Eger bir adamǵa shyqqanda atalǵan soma kúnkóris deńgeiiniń 70 protsentinen aspasa, 21 000 teńgelik járdemaqyǵa iligýge bolady. «Máselen, ákesi 50 myń teńge tapsyn, sheshesi taǵy 30 myń teńge tabady. Sonda olardyń bir ailyq tabysy 80 myń teńge bolady. Otbasyda áke-sheshesi jáne alty bala bar deiik, sonda bir ailyq tabysty 8 adamǵa bólý kerek. Demek, árqaisysyna 10 myńnan túsedi. Qazirdiń ózinde ol otbasynyń tabysy bir adamǵa shaqqanda kúnkóris deńgeiiniń 50 protsentinen de tómen bolyp tur. Ony taǵy 70 protsentke kóteremiz dep otyr. Ol 20 myńnyń ústinde. Bul degenimiz, kópbalaly otbasynyń ailyq tabysy bir balaǵa shaqqanda 20 myńnan tómen bolsa, jańaǵy 21 myń teńgeniń járdemaqysy berilýi kerek», - dedi S.Jubaev.
Prezidenttiń keshegi tapsyrmasyna sáikes, kópbalaly otbasynyń tabysy eseptelgende basqa áleýmettik tólemder - kópbalaly analar men múgedek balalardyń járdemaqylary sanalmaidy.
Aita keteiik, keshe QR Prezidenti Nursultan Nazarbaev kópbalaly otbasylarda árbir balanyń tólemaqysyn 21 myń teńgege deiin arttyrýdy tapsyrdy. «Úkimetke áleýmettik jaǵynan az qamtylǵan azamattardy, ásirese, kópbalaly otbasylardy qoldaý sharalaryn keńeitýdi tapsyramyn. Atalǵan kórsetkishti kúnkóris deńgeiiniń 70 paiyzyna deiin jetkizýimiz kerek. Al ataýly kómek alyp otyrǵan kópbalaly otbasylardyń árbir balasyna beriletin járdemaqyny 21 myń teńgege deiin ósirýdi tapsyramyn. Atalǵan kómekti barynsha jeńildetý kerek. Halyq ary-beri shapqylap júrmesin. Sosyn ondai otbasylardyń tabysyn eseptegende basqa áleýmettik járdemaqylardy sanaýdy alyp tastaý qajet. Áitpese, sonyń bárin sanaǵanda kópbalaly otbasylar jaǵdai jaqsy azamattar bolyp shyǵa keledi», - dep atap kórsetti N.Nazarbaev.
Prezidenttiń sezde sóilegen sózin myna jerden oqýǵa bolady.
