Qyzylorda oblysy Aral aýdanynda qulaǵan AN-2 ushaǵyna bailanysty oqiǵanyń mán-jaiy anyqtaldy, dep habarlaidy QazAqparat tilshisi.
Esterińizge salsaq, búgin tús áletinde sanitarlyq aviatsiia qyzmetin atqaratyn AN-2 ushaǵy Aral qalasyna jaqyn aýmaqta ornalasqan Altyqudyq degen jerge qulap, tolyǵymen janyp ketken. Atalǵan oryn aýdan ortalyǵynan shamamen 21 shaqyrym qashyqtyqta.
Bul jóninde habarlama oblystyq tótenshe jaǵdailar departamentine saǵat 12.10-de túsken.
Órt sóndirýshiler oqiǵa ornyna kelgende ushaq tolyqtai janyp ketken.
«Ekipaj «Sanaviatsiia» qyzmetiniń tapsyrmasy boiynsha ushyp shyqqan. Keleńsiz jaǵdai ushaqtyń qoný kezinde tirkelgen. Aýdan aýmaǵynda tuman túsýinen aýa raiynyń qolaisyz bolǵandyǵy anyqtaldy. Qoný barysynda ushaq batpaqqa qulap, aýdarylyp ketken. Ushaq ishinde 1970 jylǵy ekipaj komandiri, 1992 jylǵy ekinshi pilot jáne 1974 jylǵy dáriger bolǵan. Olardyń barlyǵy aman, eshqandai zardap shekpegen. Olarǵa meditsinalyq kómek qajet bolǵan joq. Artynsha órt shyǵyp, ushaq tolyq janyp ketken», - dedi oblystyq tótenshe jaǵdailar departamenti basshysynyń orynbasary Said Moldaqaraev.
Málim bolǵanyndai, ushaq saǵat 9.30 shamasynda Qyzylorda áýejaiynan tiisti baǵytqa bet alǵan. 1987 jyly shyǵarylǵan áýe tehnikasy byltyr qarasha aiynda jóndeýden ótkizilip, ushýǵa qaita ruqsat etilgen.
