Aral teńizi mańyndaǵy sý basý qaýpi joǵary eldi meken turǵyndary túgeldei kóshirildi, dep habarlaidy Habar24 kz.
Qazir Syrdariia boiyndaǵy sharýa qojalyqtarynyń tórt túligi ózge jaiylymdarǵa shyǵarylyp jatyr. Aqlaq sý tospasyna sekýndyna 209 tekshe metr sý kelip jatyr. Ol byltyrǵy deńgeiden 2 esege tómen. Biraq ózen arnasynyń teńizge quiar saǵasynda qalyńdyǵy 25 santimetrlik muz qatyp tur. Sondyqtan seń qozǵalǵan sátte muz keptelisi bolýy múmkin.
Qorǵanys bógetterin nyǵaityp júrgen sala mamandarynyń boljaýynsha sýdyń mol kólemi Aral aýdanyna naýryzdyń orta sheninde jetedi. Kúndiz-túni ózen jaǵalaǵan qutqarýshylar 25 tehnikasymen qyr basynda bolýy yqtimal tótenshe jaǵdaiǵa daiyn otyr. Biyl ózge óńirler sekildi Aralǵa da qar kóp jaýdy. Salqyn yzǵar sál synǵan sátte aq ulpa erip, aýdan ortalyǵy kóshelerine sý jaiyla bastady.
«Aral qalasyndaǵy 216 kósheniń 28-si qaýipti aimaqta. Ol jerdi qardan tazaladyq. Jalpy aýdan kólemindegi, onyń ishinde Aral qalasyndaǵy 12 myńnan astam jeke turǵyn úidiń birde-biriniń esiginen sý kirgen joq. 2 jarym myń pashyn qamys, 10 myńnyń ústinde qap, basqa da inertti materialdar Amanótkel aýyldyq okrýginiń bazasynda tur. Qosymsha 10 tonna dizel, 5 tonna benzin daiyn tur»,-dedi Aral aýdanynyń ákimi Muhtar Orazbaev.
