Qyzylorda oblysy Qazaly aýdanynan otyzǵa jýyq túie Birikken Arab Ámirligine eksporttaldy, dep habarlaidy "Ult aqparat".
Túieler «Jeńis» sharýa qojalyǵyna tiesili. Qojalyq basshysy Eset Serimovtiń aitýynsha, Arab túbeginen kelgen kásipkerlerdiń kózi «Bir týǵan nar» dep atalatyn túie tuqymyna túsken. Bul túie qazaqtyń aiyr órkeshti túiesi men túrkimenderdiń túiesimen býdandastyrý arqyly alynǵan.
«Arabtar «Bir týǵan nardyń» 1-2 jasaryn jáne asyl tuqymdy aiyr órkeshtiniń de birnesheýin aldy. Birikken Arab Ámirliginiń tabiǵaty qatal, jazy aptap ystyq, sýsyz shól dala. Sondyqtan, jergilikti turǵyndar tózimdi túie túligin ósirgendi qolaily kóredi. Bizdiń tabiǵat ol jaqqa uqsas eken. Sol úshin arab kásipkerleri Syr óńiriniń túielerine qyzyǵyp otyr», - deidi kásipker Eset Serimov.
BAÁ kásipkerleri «Jeńis» sharýa qojalyǵynan 20 bas jáne taǵy birqatar kásipkerden 9 bas túie satyp alǵan. Olar aldaǵy ýaqytta Qazaqstanǵa taǵy da kelip, saýdalasýdy josparlap otyr.
Jalpy, BAÁ-den kelgen qonaqtar Qyzylorda oblysy boiynsha 100 túie satyp alǵan. Olardy eline áketý úshin ushaq jaldaǵan.
