Ortalyq kommýnikaiialar qyzmetinde QR Energetika ministri Maǵzum Myrzaǵalievpen ótken brifingte Shyǵys Qazaqstandaǵy eki birdei sý elektr stansanyń nege satylymǵa shyǵarylǵany týraly saýal qoiyldy, dep habarlaidy QazAqparat.
Ministr Maǵzum Myrzaǵaliev bul investitsiialyq jobanyń Qazaqstanǵa ne beretin qysasha bylai dep túsindirdi:
«Jalpy biz óz jumysymyzda árdaiym elde jaǵymdy investititsialyq klimat qalyptastyryp, shetel investitsiiasyn tartýǵa tyrysamyz. Bul óte mańyzdy. Arab investorlarymen ShQO-ǵy 2 sý elektr stansasynyń 74,99 paiyz aktsiiasyn satý boiynsha júrgizip jatqan kelissózder ne úshin qolǵa alyndy. Nege biz ol nysandardy satqymyz keledi?
Birinshiden, iri arab kompaniialaryn GES-terden bólek Qazaqstannyń jaly energetika salasyna investitsiia salǵyzý úshin tartyp otyrmyz. Arab kompaniialarymen 6 mlrd dollardan astam investitsiia ákelý máselesin talqylap jatyrmyz. Bul bizdiń elge, energetika salasyna kerek jaqsy investitsiialar», - dedi ministr.
Aitýynsha, memleket baqylaýynda qalatyn 25 paiyzdan sál asatyn aktsiia paketi saladaǵy ahýaldy rettep otyrýǵa ábden jetkilikti.
«74,99 paiyz aktsiiasy satylady degenge kelsek, óz quzyrymyzda 25 paiyzdan astam aktsiiasyn qaldyrǵymyz keledi. Osy arqyly «buǵattaý quqyǵyn» beretin aktsiia paketi memlekettiń qolynda bolady.
Úshinshiden, GES-ter týraly aitqanda, investorlarmen sol nysandardyń qýatyn arttyrý baǵytynda kelisý óte mańyzdy. Iaǵni, qazir bul eki stansanyń jalpy qýaty 1GVt-tan sál asady. Biraq Shúlbiniń boiynda jańa GES kaskadyn salý múmkindigi bar. Bul stansanyń qýatyna taǵy 500-600 MVt qosýǵa múmkindik beredi», - dedi Maǵzum Myrzaǵaliev.
