Qazaqstan Respýblikasy ekologiia, geologiia jáne tabiǵi resýrstar ministrliginiń orman sharýashylyǵy jáne janýarlar dúniesi komiteti "Ashyq NQA" saitynda "Jek dýadaqqa saiatshylyq qurý týraly" úkimet qaýlysynyń jobasyn jariialady, dep habarlaidy Sputnik agenttigi.
Qujatqa sáikes 2021 jyldyń 1 qyrkúiegi men 15 qarashasy aralyǵynda myna tulǵalarǵa óz itelgilerimen jek dýadaqqa saiatshylyq qurýǵa ruqsat berý qarastyrylǵan:
- Sheih Halifa Bin Zaid Ál Nahaianǵa (Birikken Arab Ámirlikteri) Túrkistan oblysyndaǵy respýblikalyq mańyzy bar Arys jáne Qaraqtaý memlekettik qoryǵy aimaǵynyń aýmaǵynda 97 (toqsan jeti) dara jek dýadaqqa jáne Jambyl, Qyzylorda jáne Túrkistan oblystaryndaǵy respýblikalyq mańyzy bar Ońtústik Qazaqstan memlekettik qoryǵy aimaǵynyń aýmaǵynda 99 (toqsan toǵyz) dara jek dýadaqqa;
- Sheih Sýrýr Bin Muhammed Ál Nahaianǵa (Birikken Arab Ámirlikteri) Mańǵystaý oblysyndaǵy respýblikalyq mańyzy bar Kendirli-Qaiasan memlekettik qoryǵy aimaǵynyń aýmaǵynda 52 (elý eki) dara jek dýadaqqa;
- Sheih Seif Bin Muhammed Ál Nahaianǵa (Birikken Arab Ámirlikteri) Mańǵystaý oblysyndaǵy respýblikalyq mańyzy bar Kendirli-Qaiasan memlekettik qoryǵy aimaǵynyń aýmaǵynda 51 (elý bir) dara jek dýadaqqa;
- Sheih Djasem Bin Hamad Bin Halifa Ál Tanige (Qatar) Jambyl oblysyndaǵy respýblikalyq mańyzy bar Ańdasai memlekettik tabiǵi qaýmalynyń aýmaǵynda 34 (otyz tórt) daraq jek dýadaqqa jáne Almaty jáne Jambyl oblystaryndaǵy respýblikalyq mańyzy bar Jýsandala memlekettik qoryǵy aimaǵynyń aýmaǵynda 80 (seksen) dara jek dýadaqqa.
Saiatshy sheihtar týraly ne bilemiz?
- Sheih Halifa Bin Zaid Ál Nahaian – 2004 jyldyń 3 qarashasynan beri Birriken Arab Ámirlikteriniń prezidenti jáne Ábý-Dabi emiri. Forbes málimeti boiynsha, álemniń eń bai adamdarynyń qatarynda jáne onyń múlki 15 milliard dollarǵa baǵalanyp otyr. Onyń otbasyndaǵy adamdardyń múlki 150 milliard dollardy qurap otyr.
- Sheih Sýrýr Bin Muhammed Ál Nahaian – Ábý-Dabi emiriniń bileýshi otbasynyń bir múshesi, murager hanzada. Qazaqstandaǵy qurylysqa investitsiia salǵan.
- Sheih Seif Bin Muhammed Ál Nahaian - general-leitenant, Ábý-Dabi emiriniń bileýshi otbasynyń bir múshesi.
- Sheih Djasem Bin Hamad Bin Halifa Ál Tani – Katardyń murager hanzadasynyń baýyry.
Bul tórt sheih te itelgimen saiatshylyq qurýdyń áýesqoilary jáne osy maqsatta Qazaqstanǵa birneshe ret kelgen.
Arab sheihteriniń saiatshylyǵy Qazaqstanǵa qansha tabys ákeledi?
Arab sheihterine jalpy sany 413 qusty aýlaýǵa ruqsat berilgen. Bir jek dýadaqtyń quny 260 ailyq eseptik kórsetkish (758 420 teńge nemese shamamen 1 780 dollar) kóleminde belgilendi.
"Qaýly jobasyn qabyldaý halyqaralyq yntymaqtastyqty damytýǵa yqpal etedi, sondai-aq 313 227 460 teńge (733,5 myń dollar) kóleminde biýdjetke qarajat túsimin qamtamasyz etedi. Qujat belgilengen tártipte ádilet, qarjy, ulttyq ekonomika, bilim jáne ǵylym jáne syrtqy ister ministrlikterimen kelisilgen", - dep jazylǵan túsinikteme jazbada.
Ekologiia ministrligi atap ótkendei, jobany qabyldaý áleýmettik-ekonomikalyq jáne quqyqtyq jaǵymsyz saldarǵa ákep soqpaidy.
