Memleket basshysy óz Joldaýynda biylǵy jyldy "Jastar jyly" dep ataýdy usynǵan bolatyn. Jaqynda Elordadada Elbasy Nursultan Nazarbaevtyń qatysýymen «Táýelsizdik urpaqtary» atty jastar jylynyń ashylý saltanaty ótti. Atalǵan jiynda aitylǵan usynystar men jańa bastamalarǵa qatysty aqyn Maraltai Raiymbekuly men alashtanýshy Aigúl Ismaqova pikir bildirgen bolatyn. Marhabat!
Maraltai Raiymbekuly, QR Ulttyq memlekettik kitap palatasy direktorynyń orynbasary, aqyn:
Men ádebiet tóńireginde aitaiyn. Menińshe bul jiynda búgingi jastardyń elbasymen pikirlesýi shyn máninde de óte quptarlyq jaǵdai. Bul kezdesý – Táýelsiz Qazaqstan jastarynyń ertege bolǵan senimin kúsheitedi, eldiń bolashaǵy týraly, memleket aldyndaǵy jaýapkershilikti, qoǵam aldyndaǵy tolyq qandy mushesi ekeni, kez-kelgen jastyń kózqarasy memleket úshin mańyzdy ekenin uqtyrdy. Búgingi jiynda Merei Qart deitin baýyrymyz «Ádebiet akademiiasyn ashý kerek» degen usynys aitty. Bul usynys óte oryndy. Meniń aitarym, birinshiden, Astana men Almaty sekildi respýblikalyq mártebege ie qalalardaǵy shyǵarmashyl jastar men saiasat, sport, óner, ǵylymǵa úles qosyp jatqan jastar baspanaly bolsa degen usynysym bar. Árine, qustyń da uiasy bolady ǵoi. Ekinshiden, elimizde shyǵarmashyl jastarǵa arnalǵan «Shabyt» atty bir ǵana festival bar. Bul elimiz jastaryna azdyq etedi. Endi osy sekildi taǵy bir festival kerek. Úshinshiden, Elbasymyz ultymyzdyń ádebieti men mádenietin jaqsy biledi. Sonyń arqasynda, ár jyldary elimizdiń ár óńirinde «Abai oqýlary», «Muqaǵali oqýlary» siiaqty is-sharalar ótip jatyr. Osy is-sharalar jalǵasyn taýyp, mektep qabyrǵasynda júrgen jastardy qanattandyrý maqsatynda, ár qaisysyna 5 granttan bólinse nur ústine nur bolar edi. Taǵy bir aitarym, aýdarma jóninde bolmaq. Qazir qazaq shyǵarmalary álemniń alty tiline aýdarylyp jatyr. Osy jobaǵa jastardy da qatystyrsa demekpin.
Aigúl Ismaqova, Filologiia ǵylymynyń doktory, ǵalym, alashtanýshy:
Biyly jyldy Elbasymyz «Jastar jyly» dep jariialaǵany óte quptarlyq jaǵdai. Sebebi, Táýelsizdik alǵanymyzǵa 28 jyl boldy. Sodan beri týǵan urpaq 28 jasqa toldy. Olardyń bilimi bar, saýatty jastar. Men Alash ádebietin ne úshin jastarǵa oqytyp kele jatyrmyn? Álihan, Ahmet, Mirjaqyptar qandai jaǵdaiǵa ushyrasada, otanǵa qyzmet etý úshin bastaryn bái tikti. Olar búgin biz armandap júrgen qoǵamdy armandady. Men qazirgi jastardan solardyki siiaqty otty rýh kútemin. «Jazdym sóz janym ashyp Alashyma» degen Ahmet Baitursynulynyń jalǵyz aýyz sózi men Mirjaqyp Dýlattyń «Oian qazaq» degenin osydan 100 jyl buryn kúlli qazaqtyń saiasi elitasy uran etip kótergen. Qazir óz jerimiz, óz elimiz, óz tilimiz bar. Biraq qazirgi jastarda óz eline degen mahabbat joq. Men jastardan sony kútemin. Ár jastar otan úshin sapaly jumys istese, otanyn gúldendirý úshin ter tókse keshegi alyptardyń armany oryndalar edi. Sodan keiin, adal júrip, eńbek ótý – elim degen jastardyń alǵy sharty bolsyn. Táýelsiz kezeńniń jas qazaǵy – rýhty bolsyn degen arman bar bizde. Osynyń bárin oryndaǵan jastar – eliniń, Elbasynyń úmitin aqtaidy dep senemin.
