QR Parlament májilisiniń depýtaty Maira Aisina qazaqstandyqtardyń internetke qoljetimdiligi týraly aitty, dep habarlaidy QazAqparart.
«Qazaqstandaǵy tsifrlandyrýdyń negizi - jańa tsifrlyq tehnologiialardy qoldaný arqyly el ómiriniń barlyq salalaryn tsifrlyq túrlenýdi jedeldetýge múmkindik beretin «Tsifrlyq Qazaqstan» baǵdarlamasy. Osy baǵdarlamanyń bes baǵytynyń úsheýi QR aýmaǵynda jyldam ári qaýipsiz internettiń, sondai-aq sapaly uialy bailanystyń qoljetimdi bolýyn qamtamasyz etýge qatysty boldy. Bul mindet elimizdegi 117 qalada oryndaldy, onyń ishinde 10,4 mln. turǵyny bar 88 qala men 29 aýyl bar. Al aimaqtardaǵy eldi mekenderge qatysty bulai aita almaimyz», - dedi Maira Aisina QR Ádilet ministrligindegi «Aýyldyq eldi mekenderde Internetke qol jetimdilikti qamtamasyz etý máseleleri boiynsha Qazaqstan Respýblikasynyń keibir zańnamalyq aktilerine ózgerister men tolyqtyrýlar engizý týraly» zań jobasyn talqylaýǵa qatysty vedomstvoaralyq komissiia otyrysynda.
Onyń aitýynsha, 250 jáne odan kóp adam turatyn 800 aýylda internet joq.
«Elimizdi internetpen qamtamasyz etýge shirek ǵasyr ketti. Endi memlekettiń mindeti – qai jerde turatynyna qaramastan, barlyq qazaqstandyq úshin IT tehnologiiasy qoljetimdi bolýyn qamtamasyz etý. Eger osy qarqynmen júre bersek, bizge taǵy qansha jyl kerek ekenin boljaý qiyn bolady. Sondyqtan barynsha qysqa merzim ishinde elimizdegi 250 jáne odan kóp adam turatyn 800 aýylǵa internet qosýymyz kerek. 2022 jyldyń aiaǵynda 50 jáne odan kóp adam turatyn 885 aýylǵa internet qosýymyz kerek», - deidi ol.
Demek, sońǵy eki jylda halyqtyń 97%-yn internet jelisine qosý kerek.
«Búgingi tańda 720 memlekettik qyzmet elektrondy formatta qoljetimdi. Bul qyzmet túrlerin interneti barlar ǵana ala alady. Al qazirgi ýaqytta árbir onynshy qazaqstandyqta mundai múmkindik joq», - deidi depýtat.
