Qyzylordalyq 38 jastaǵy kóp balaly ana Jibek Jaqsybalaeva toǵyz perzent dúniege alyp kelgen. Biyl bul otbasy taǵy bir náreste súimekshi, dep habarlaidy QazAqparat.
Jibek 21 jasynda Berik Sarbasov esimdi jigitpen otaý kótergen. Sodan bergi jyldarda shýaqty shańyraqta toǵyz perzent ómir esigin ashty. Ol «Altyn alqa» iegeri ataǵyna 28 jasynda ie bolǵan. Sol joly egiz qyz bosanǵan edi.
Búginde otbasynyń úlkeni Arýjan pedagogikalyq kolledjdiń úshinshi kýrsynda grantpen bilim alyp jatyr. Ekinshi perzenti - uly Damir estiiar jasqa kelip qaldy, jergilikti «Ulaǵat» kolledjiniń birinshi kýrsynda oqidy.
Balalardyń aldy kolledjde bilim alyp jatsa, altaýy mektepte. Kishkentaiy Áminanyń jasy - úshte, balabaqshada tálim alyp júr.
«Men Qorqyt ata atyndaǵy Qyzylorda ýniversitetinde «munai-gaz» mamandyǵy boiynsha bilim aldym. Turmysqa shyqqannan keiin balalardyń tárbiesine kóńil bólgendi jón sanadym. Perzentterimniń arasy - 1-1,5 jyl. Bala tárbiesi - úlken jaýapkershilik. Qazir úide balalaryma qaraimyn», - deidi ol.
Joldasy Berik qurylys salasynda eńbek etedi. Qoly qalt etse, balalardyń sabaǵyna kómektesip, kerek-jaraǵyn túgendeidi.
Jibek alǵashqyda qiyn bolǵanyn aitady. Bir-birimen teteles óskendikten olarǵa qaraýǵa úlgermei jatatyn. Keiin úlkenderi eseiip, bir-birine qol ushyn soza alatyn jaǵdaiǵa jetken.
Jibektiń ózi de kóp balaly otbasynda ósken. Anasy 19 qursaq kótergen Batyr ana. Ózi de kóp balaly bolǵanyn qalaǵan.
«Ár balanyń óz nesibesi bar. Memleket tarapynan túrli járdemaqy beriledi. Jergilikti basshylyq tarapynan basqa da qoldaýlar bar. Halqymyzda «Bir qozy týsa, bir túp jýsan artyq shyǵady» degen sóz bar. Sondyqtan kóp balaly bolǵan artyq emes», - deidi Jibek.
Bul otbasy birneshe jyl buryn turǵyn úi kezegine tirkelgen edi. Biyl baspanaly bolatyny jóninde qýanyshty habar kelip jetti.
