قىزىلوردالىق 38 جاستاعى كٶپ بالالى انا جٸبەك جاقسىبالاەۆا توعىز پەرزەنت دٷنيەگە الىپ كەلگەن. بيىل بۇل وتباسى تاعى بٸر نەرەستە سٷيمەكشٸ, دەپ حابارلايدى قازاقپارات.
جٸبەك 21 جاسىندا بەرٸك سارباسوۆ ەسٸمدٸ جٸگٸتپەن وتاۋ كٶتەرگەن. سودان بەرگٸ جىلداردا شۋاقتى شاڭىراقتا توعىز پەرزەنت ٶمٸر ەسٸگٸن اشتى. ول «التىن القا» يەگەرٸ اتاعىنا 28 جاسىندا يە بولعان. سول جولى ەگٸز قىز بوسانعان ەدٸ.
بٷگٸندە وتباسىنىڭ ٷلكەنٸ ارۋجان پەداگوگيكالىق كوللەدجدٸڭ ٷشٸنشٸ كۋرسىندا گرانتپەن بٸلٸم الىپ جاتىر. ەكٸنشٸ پەرزەنتٸ - ۇلى دامير ەستييار جاسقا كەلٸپ قالدى, جەرگٸلٸكتٸ «ۇلاعات» كوللەدجٸنٸڭ بٸرٸنشٸ كۋرسىندا وقيدى.
بالالاردىڭ الدى كوللەدجدە بٸلٸم الىپ جاتسا, التاۋى مەكتەپتە. كٸشكەنتايى ەمينانىڭ جاسى - ٷشتە, بالاباقشادا تەلٸم الىپ جٷر.
«مەن قورقىت اتا اتىنداعى قىزىلوردا ۋنيۆەرسيتەتٸندە «مۇناي-گاز» ماماندىعى بويىنشا بٸلٸم الدىم. تۇرمىسقا شىققاننان كەيٸن بالالاردىڭ تەربيەسٸنە كٶڭٸل بٶلگەندٸ جٶن سانادىم. پەرزەنتتەرٸمنٸڭ اراسى - 1-1,5 جىل. بالا تەربيەسٸ - ٷلكەن جاۋاپكەرشٸلٸك. قازٸر ٷيدە بالالارىما قارايمىن», - دەيدٸ ول.
جولداسى بەرٸك قۇرىلىس سالاسىندا ەڭبەك ەتەدٸ. قولى قالت ەتسە, بالالاردىڭ ساباعىنا كٶمەكتەسٸپ, كەرەك-جاراعىن تٷگەندەيدٸ.
جٸبەك العاشقىدا قيىن بولعانىن ايتادى. بٸر-بٸرٸمەن تەتەلەس ٶسكەندٸكتەن ولارعا قاراۋعا ٷلگەرمەي جاتاتىن. كەيٸن ٷلكەندەرٸ ەسەيٸپ, بٸر-بٸرٸنە قول ۇشىن سوزا الاتىن جاعدايعا جەتكەن.
جٸبەكتٸڭ ٶزٸ دە كٶپ بالالى وتباسىندا ٶسكەن. اناسى 19 قۇرساق كٶتەرگەن باتىر انا. ٶزٸ دە كٶپ بالالى بولعانىن قالاعان.
«ەر بالانىڭ ٶز نەسٸبەسٸ بار. مەملەكەت تاراپىنان تٷرلٸ جەردەماقى بەرٸلەدٸ. جەرگٸلٸكتٸ باسشىلىق تاراپىنان باسقا دا قولداۋلار بار. حالقىمىزدا «بٸر قوزى تۋسا, بٸر تٷپ جۋسان ارتىق شىعادى» دەگەن سٶز بار. سوندىقتان كٶپ بالالى بولعان ارتىق ەمەس», - دەيدٸ جٸبەك.
بۇل وتباسى بٸرنەشە جىل بۇرىن تۇرعىن ٷي كەزەگٸنە تٸركەلگەن ەدٸ. بيىل باسپانالى بولاتىنى جٶنٸندە قۋانىشتى حابار كەلٸپ جەتتٸ.
