QR Eńbek jáne xalyqty áleýmettik qorǵaý vitse-ministri Svetlana Jaqypova 1 sáýirden bastap ataýly áleýmettik kómektiń jańa túrin tóleýge daiyndyq sharalary týraly aityp berdi. Prezidenttiń tapsyrmasy boiynsha árbir balaǵa 21 myń teńgelik járdemaqy kelesi aidan bastap tólenýi kerek, dep xabarlaidy QazAqparat tilshisi.
Vitse-ministrdiń aitýynsha, ataýly áleýmettik kómek elektrondy qujattardyń negizinde taǵaiyndalady. Sol sebepti kópbalaly otbasylarǵa qujat jinap, ary-beri shapqylaýdyń qajeti joq.
«Al belgili bir otbasynyń qujattary aqparattyq bazada bolmasa, qujat jinaýǵa aýyl ákimi men jumyspen qamtý ortalyǵynyń mamandary jaýapty bolady. Búginde ministrlik ákimderge aqparattyq júielerge kirýge múmkindik jasap jatyr. Olar suraýdy elektrondy túrde joldap, tiisti qujattardy jinai alady. Búginde 1 405 aýyldyq okrýg aqparattyq júielerge qosyldy. Jaqyn arada taǵy 1 000-ǵa jýyq aýylǵa osyndai múmkindik beriledi», - dedi S.Jaqypova jýrnalisterge bergen suxbatynda.
Onyń sózine qaraǵanda, kópbalaly otbasy tek ákimdikke baryp, ótinish tapsyryp ketýi kerek.
«Máselen, otaǵasy ákimge baryp, ótinish jazady. Sonda otbasy músheleriniń JSN-dary (jeke sáikestendirý nómirleri - avt.) men aty-jónderin kórsetý kerek. Tek sol ótinish qana. Qalǵan qujattardy jergilikti atqarýshy organdar men jumyspen qamtý ortalyqtary elektrondy túrde aqparattyq júielerden, basqa memlekettik organdardyń resýrstarynan ózderi jinaidy. Negizi, 1-inen bastap tek qujattardy ǵana qabyldaidy. Sáýir boiy taǵaiyndaý júredi. Ataýly áleýmettik kómek qujat qabyldanǵan kúnnen bastap tólenetin bolady. Sosyn buryn kópbalaly otbasylar toqsan saiyn óz tabystaryn rastap otyratyn. Endi, atalǵan kezeń jartyjylǵa deiin uzartylady. Onyń ózi aqparattyq júieler arqyly tekseriledi», - dep atap kórsetti S.Jaqypova.
Vitse-ministri 21 myń teńgelik járdemaqyny taǵaiyndaý kezinde jeke sharýashylyqty esepke alýǵa qatysty pikir bildirdi.
Eske sala ketsek, «Nur Otan» partiiasynyń XVIII sezinde QR Prezidenti Nursultan Nazarbaev kópbalaly otbasylarda árbir balanyń tólemaqysyn 21 myń teńgege deiin arttyrýdy tapsyrǵan bolatyn.
«Úkimetke áleýmettik jaǵynan az qamtylǵan azamattardy, ásirese, kópbalaly otbasylardy qoldaý sharalaryn keńeitýdi tapsyramyn. Atalǵan kórsetkishti kúnkóris deńgeiiniń 70 paiyzyna deiin jetkizýimiz kerek. Al ataýly kómek alyp otyrǵan kópbalaly otbasylardyń árbir balasyna beriletin járdemaqyny 21 myń teńgege deiin ósirýdi tapsyramyn. Atalǵan kómekti barynsha jeńildetý kerek. Halyq ary-beri shapqylap júrmesin. Sosyn ondai otbasylardyń tabysyn eseptegende basqa áleýmettik járdemaqylardy sanaýdy alyp tastaý qajet. Áitpese, sonyń bárin sanaǵanda kópbalaly otbasylar jaǵdai jaqsy azamattar bolyp shyǵa keledi», - dedi N.Nazarbaev.
Memleket basshysy atalǵan sharalardy 1 sáýirden bastaýdy mindettedi.
