Ár aýdan ózin-ózi qamtamasyz ete alatyndai jaǵdaiǵa jetýi tiis. Túrkistan oblysynyń ákimi Ómirzaq Shókeev Ordabasy aýdany ákiminiń esep berý kezdesýinde osylai dedi, dep habarlaidy "Ult aqparat" oblys ákiminiń baspasóz qyzmetine silteme jasap.
Ordabasy aýdanynyń ákimi Álipbek Óserbaevtyń halyqqa esep berý kezdesýinde ótken jyldyń áleýmettik-ekonomikalyq damýy qorytyndylandy. Aýdan ákiminiń esebine oblys ákimi Ómirzaq Shókeev qatysty.
Aýdannyń shyǵysy men kirisin jik-jikke bólip, halyqqa esep bergen aýdan basshysy ekonomikaǵa aldaǵy ýaqytta serpin beretin mańyzdy josparlarmen bólisti. Aitýynsha, 2020 jyly jalpy investitsiialyq quny 97 mlrd. teńgeden astam qarjyny qurap, 600-ge jýyq adamdy jumyspen qamtityn plastmassa jáne munai-himiia ónimderin óndirýge baǵyttalǵan 4 jobany iske asyrý kózdelip otyr.
Ordabasy aýdanynyń ónim kólemi byltyr 79, 2 mlrd teńgeni quraǵan. Kiristiń basym bóligi ónerkásip pen aýylsharýashylyǵy salasyna tiesili. Aýdanda búginde tamaq ónerkásibi, farmatsevtika, metallýrgiia, mashina jasaý, qurylys salasy men ken óndirý ónerkásibi syndy kásiptermen ainalysatyn 35 kásiporyn qyzmet kórsetedi. Sonyń arqasynda halyq turaqty jumyspen qamtylyp keledi. El aldynda sóz alǵan oblys basshysy aýdanda atqarylyp jatqan jumystarǵa toqtalyp ótti.
«Men ákimderdiń esebine baǵa berý úshin kelmeimin. Baǵany sizder beresizder. Basshy jumysynyń nátijesin halyq ózi-aq kóredi. Ákimder halyqqa jaqyn bolýy tiis. Al ár aýdan ózin-ózi qamtamasyz ete alatyndai dárejege jetýi kerek. Investor tartýdy myqtap qolǵa alǵan jón. Mysaly, osy Ordabasy aýdanynda Izrail elinen kelgen investorlar qarbyzdy sýsyz egip jatyr. Osyndai jańalyqtardy úirenýge bolady. Arysqa AQSh investorlary kelip jatyr. Olar spýtnikten kórip, tabiǵaty qolaily ekenin zerttegen. Sóitip biregei joba usyndy. Jańashyldyqqa jaqyn bolaiyq. Jańalyq ashýǵa qumar bolaiyq. Ákim biznespen bir tilde sóilese bilýi kerek. Ázirge bizdegi ár kásipkerdiń salyǵy 100 myń teńgeden aspai otyr», - dedi aimaq basshysy Ómirzaq Estaiuly.
Aýyl sharýashylyǵy salasyna toqtalsaq, egis kólemi áldeqaida artyp 65 374 gektarǵa jetken. Kóbinese sýdy az qajet etetin daqyldarǵa kóńil bólinip otyr. Sońǵy jyldary aýdan aýmaǵynda jylyjai salýǵa niet bildirýshilerdiń de qatary artqan. Byltyr jalpy kólemi 72 gektardy quraityn búkil jylyjailardan 8 580,3 tn ónim jinalǵan.
