Aqtóbede jańa fýtbol stadionyn salýǵa Úkimet rezervinen 6,5 mlrd teńge bólindi, dep habarlaidy ult.kz.
Qarajat Memleket basshysy Qasym-Jomart Toqaevtyń 2025 jyly Ulttyq quryltaidyń IV otyrysynda bergen fýtboldy damytý jáne óńirlerdegi sport infraqurylymyn jańǵyrtý jónindegi tapsyrmasyn oryndaý aiasynda baǵyttaldy.
Jańa stadion qalanyń batys bóliginde, aýmaǵy 25 gektar jerde salynyp jatyr. Arena 35 myń kórermenge deiin qabyldai alady. Joba ÝEFA-nyń 4-deńgei talaptaryna sáikes ázirlengen.
Jalpy aýdany 80 myń sharshy metrden asatyn bes qabatty sport kesheninde fýtbol alańy men kórermender tribýnalarynan bólek, komandalar men BAQ ókilderine qajetti infraqurylym qarastyrylady. Sonymen qatar nysanda jas sportshylardy daiarlaýǵa múmkindik jasalady.
Jobany úsh kezeńde iske asyrý josparlanǵan. Úkimet bólgen 6,5 mlrd teńge qurylystyń biyl bastalǵan birinshi kezeńine jumsalady. Stadiondy 2028 jyldyń qyrkúieginde paidalanýǵa berý josparlanyp otyr.
Jańa arenanyń qurylysy Aqtóbedegi fýtbolǵa degen joǵary suranysqa bailanysty qolǵa alynǵan. Qaladaǵy qazirgi ortalyq stadion 1975 jyly salynǵan jáne shamamen 13 myń kórermenge arnalǵan.
«Aqtóbe» fýtbol klýbynyń óz alańyndaǵy matchtaryna qyzyǵýshylyq joǵary. Kei kezderi oiynǵa barǵysy keletin jankúierler sany qoldanystaǵy stadion syiymdylyǵynan úsh ese asyp túsedi.
Jańa arena jankúierlerdi kóbirek qabyldap qana qoimai, halyqaralyq deńgeidegi fýtbol matchtaryn, sondai-aq iri sporttyq, mádeni jáne qoǵamdyq is-sharalardy ótkizýge múmkindik beredi.
