Aqtaý qalasynda 22–26 shilde aralyǵynda pilotsyz ushý apparattaryn (drondardy) ushyrýǵa ýaqytsha tyiym engizildi. Bul týraly qala ákimdigi habarlady, dep habarlaidy ult.kz.
Ákimdiktiń málimetinshe, shekteý atalǵan kúnderi ótetin oqý-jattyǵý is-sharalarynyń qaýipsizdigin qamtamasyz etý maqsatynda qabyldanǵan.
Sondai-aq ákimdik Qazaqstan Respýblikasynyń Azamattyq aviatsiia komitetinde tirkelmegen jáne zańnamaǵa sáikes esepke qoiylmaǵan pilotsyz áýe kemelerin paidalanǵan azamattar ákimshilik jaýapkershilikke tartylatynyn eskertti.
«Qazaqstan Respýblikasynyń Ákimshilik quqyq buzýshylyq týraly kodeksiniń 563-babyna sáikes, talapty buzǵandarǵa aiyppul salynady», – delingen resmi habarlamada.
Osyǵan bailanysty turǵyndarǵa ýaqytsha shekteýdi saqtap, tirkelmegen drondardy paidalanbaý usynyldy.
Eske salaiyq, buǵan deiin drondar men jasandy intellekt tehnologiialarynyń energetika salasyndaǵy aqaýlardy erte anyqtaýǵa múmkindik beretini týraly habarlanǵan bolatyn.
