Elimizde 1 sáýirden bastap qyzylshaǵa qarsy ekpe salý bastalady. Bul týraly búgin Úkimet otyrysynan keiin BAQ ókilderine elimizdiń bas sanitar dárigeri Jandarbek Bekshin málim etti, dep habarlaidy QazAqparat tilshisi.
«Qazirgi ýaqytta qyzylshaǵa qatysty ahýal burynǵy deńgeide, apta saiyn shamamen 400 oqiǵa tirkelip otyr. 1 sáýirden ekpe salýǵa kirisemiz. Ol úshin 20 naýryzǵa deiin qyzylshaǵa, paratit jáne qyzamyqqa qarsy úsh valentti vaktsina jetkiziledi. 478 myń doza alamyz. Ony eń birinshi kezekte balalarǵa salamyz. Sebebi aǵymdaǵy jyly ózgeshe infektsiia ekpe salatyn jasqa tolmaǵan 12 ailyq balalarǵa juǵyp jatyr. Biz ekpe salýdy 9 aiǵa jyljyttyq. Bul ǵylymi negizdelgen», - dedi ol.
Bas sanitar dárigerdiń aitýynsha, ekinshi kezekte naýqastarmen tikelei jumys isteitin dárigerlerge salynady.
«Vaktsinanyń negizgi bóligi ekpe saldyrýdy qalaǵan adamdarǵa salynady», - dedi Bekshin.
Sonymen qatar, ol jazǵa qarai vaktsinanyń qosymsha kólemi satyp alynatyndyǵyn atap ótti. Onyń dereginshe, 2018 jyldyń qarashasynan Qazaqstanda qyzylshamen aýrýdyń 4 myńnan astam deregi tirkelgen. Aýrǵan balalardyń ata-analary (12 paiyz) ekpe saldyrmai qoiǵan. Ekpe salynbaǵan balalardyń 60 paiyzy 12 aiǵa tolmaǵan sábiler, 32 paiyzy meditsinalyq qarsy kórsetim bolǵannan keiin almaǵan.
