Atyraýda Nazarbaev Ziiatkerlik mektebiniń oqýshysy dombyra shertýdi úiretetin baǵdarlama jasap, Apple kompaniiasynan diplom aldy, dep habarlaidy "Ult aqparat".
Asqar Álmuhametov biyl Nazarbaev Ziiatkerlik mektebiniń 10-synybyna barady. Ol dombyra shertýdi úiretetin simýliator jasap, ony Apple kompaniiasy uiymdastyrǵan baiqaýǵa joldaǵan.
«Áigili Stiv Djobs negizin qalaǵan Apple kompaniiasy baǵdarlama jasaýmen ainalysatyn jastardy yntalandyrý úshin jyl saiyn innovatsiialyq jobalar baiqaýyn ótkizedi. Konkýrstyń sharty boiynsha áýeli úzdik jumystar irikteledi. Odan soń kompaniia ókilderi jobanyń avtorlarymen bailanysqa shyǵady. Men bul konkýrsqa dombyra tartýdy úiretetin simýliatordy usyndym. Simýliator Swift baǵdarlamasymen jasaldy», - deidi Asqar Álmuhametov.
Oqýshynyń aitýynsha, úzdik jeńimpazdar Apple kompaniiasy qarjylandyratyn bilim grantyna ie bolady. Bul grant daryndy jastardyń San-Frantsisko qalasyndaǵy (AQSh) Apple keńsesinde tájiribe jinaýǵa múmkindik beredi. Alaida, álemde oryn alǵan pandemiiaǵa bailanysty bul jospar keiinge qaldyrylǵany belgili boldy. Biraq, uiymdastyrýshylar atyraýlyq oqýshy Asqar Álmuhametovtiń eńbegin baǵalap, yntalandyrý úshin kompaniia atynan kúzgi kúrteshe, kádesyi men konkýrsqa qatysqany úshin diplomdy tabystaǵan.
Asqar Álmuhametov – respýblikalyq, halyqaralyq deńgeidegi startap konkýrstardyń jeńimpazy. Buǵan deiin ol balalar úshin «Qulynym» mobildik qosymshasyn jasaǵan. Bul qosymshada mektepke deiingi balalar úshin qazaqtildi kontent jinaqtalǵan. Keleshekte Nazarbaev Ziiatkerlik mektebiniń oqýshysy IT salasyn jetik meńgerý arqyly ulttyq tehnologiia salasyn jańǵyrtýdy kózdep otyr.
