Senbi kúni Almatyda apatqa ushyraǵan AN-26 áskeri ushaǵynda qaza tapqan Ǵabit Barlyqbaevty búgin jaqyndary aqtyq saparǵa shyǵaryp saldy. Aviatsiia bóliminiń shtýrmany týra múshel jasynda ómirden ozdy. 36 jastaǵy azamattyń artynda 3 balasy, jary, ata-anasy qaldy, dep habarlaidy "Ult aqparat".
«Ózderi aidaityn áskeri ushaqtardyń daýysyn balalaryna, maǵan úiretip qoiǵan. Eger biz daýysyn bilmei qalsaq, qalaisha meniń júrgizetin ushaǵymnyń daýysyn bilmeisiń dep renjitin. Biz úide otyryp, ushaqtyń daýysyna qarap biletinbiz. Mine AN-24, mine AN-26 kele jatyr dep. Ózi úshyp kele jatqanda qońyraý shalyp, aitatyn, balalardy balkonǵa shyǵarshy, men ushyp kele jatyrmyn dep», - dep jaryn eske alady Gúlzira Ormanbekova.
Ushaq apatynda qaza tapqan ushqysh Ǵabit Barlyqbaev úsh aǵaiyndy eken. Ózi úidiń tuńǵyshy bolǵan. Ushqysh bolýdy bala kúninen arman etken azamat Aqtóbede bilim alyp, otan qorǵaý salasynda 20 jylǵa jýyq qyzmet etti. Ushqyshtyń artynan ergen eki inisi de áskeri qyzmette.
«Úsh ulymdy da Otanyna, halqyna qyzmet et dep berdim. Úsheýi de áskeri qyzmetker. Onyń ekeýi ushqysh. Balalaryma rizamyn. Halqynyń úmitin aqtap jatyr, bergen anttaryna adal»,- dedi marqum Ǵabit Barlyqbaevtyń ákesi Esim Barlyqbaev.
Boraldai kentinde qyzmet etken ushqyshtyń denesi ózi týǵan Taldyqorǵan mańyndaǵy Baqtybai aýylynda jer qoinyna tapsyryldy. Ǵabit Barlyqbaevtyń úlken balasy 9 da bolsa, kishkentai 2-aq jasta.
