Agroónerkásip keshenin memlekettik qoldaýdyń tiimdiligin arttyrý maqsatynda bizneske mindettemeler júkteledi. Bul týraly halyqqa esep berý kezdesýinde QR Aýyl sharýashylyǵy ministri Saparhan Omarov aitty, dep habarlaidy QazAqparat.
Saparhan Omarovtyń aitýynsha, agroónerkásip keshenin odan ári turaqty damytý maqsatynda Aýyl sharýashylyǵy ministrligi Memleket basshysynyń tapsyrmasy boiynsha «Agroónerkásip keshenin damytýdyń 2021-2030 jyldarǵa arnalǵan tujyrymdamasyn» jáne «AÓK damytýdyń 2021-2025 jyldarǵa arnalǵan ulttyq jobasyn» ázirlegen. Osy jyldyń 21 sáýirinde AÓK damytýdyń jalpy tásilderi QR Prezidenti janyndaǵy reformalar jónindegi Joǵary Keńes múshelerine tanystyryldy jáne Prezident maquldady. Memleket basshysy Tujyrymdama men Ulttyq joba arasyndaǵy sharalardyń arajigin ajyratýdy tapsyrdy.
«Tujyrymdama salany - uzaq merzimdik kezeńge damytýdyń basymdyqtary men vektorlaryn aiqyndaidy, sondyqtan júieli sipattaǵy sharalardy, onyń ishinde zańnama men normativtik-quqyqtyq bazany ózgertýdi qamtidy. Al, Ulttyq joba kúsh-jiger men resýrstardy shoǵyrlandyrýdy talap etetin naqty mindetter men jobalardy sheshýge baǵyttalǵan», - dedi ol.
Ministrdiń aitýynsha, tujyrymdamanyń negizgi mindetteri memlekettik qoldaý sharalarynyń tiimdiligin arttyrý; veterinarlyq jáne fitosanitarlyq qaýipsizdikti qamtamasyz etý; Jer resýrstarynyń qoljetimdiligin qamtamasyz etý; qarjy quraldaryn jetildirý jáne júieli sipattaǵy basqa da is-sharalardy qamtidy.
«Júieli qujattar aiasynda memlekettik qoldaý is-sharalarynyń turaqtylyǵy men sabaqtastyǵyn qamtamasyz etýdi normativti túrde bekitý josparlanýda. Bul agrarshylarǵa óz qyzmetin uzaq merzimdi perspektivaǵa josparlaýǵa múmkindik beredi. Sondai-aq, memlekettik qoldaýdyń tiimdiligin arttyrý maqsatynda bizneske mindettemeler júkteletin bolady. Budan bólek, Memleket basshysynyń tapsyrmasymen «memlekettik qoldaý» bólinerde óńirlerdiń erekshelikteri eskeriletin bolady. Bul tabiǵi-klimattyq jáne basqa da faktorlarǵa bailanysty AÓK damytý salasynda memlekettik saiasatty tiimdi júrgizýge múmkindik beredi», - dedi Saparhan Omarov.
