Qazaqstannyń agroónerkásiptik kesheninde monitoring, taldaý jáne boljaý boiynsha biryńǵai tsifrlyq sitýatsiialyq ortalyq qurylady. Bul jaily Parlament Májilisinde agrarlyq ǵylymdy, bilim jáne óndiristi integratsiialaý máseleleri boiynsha otyrysta Ulttyq agrarlyq ǵylymi bilim berý ortalyǵynyń basqarma tóraǵasy Tóleýtai Raqymbekov málim etti, dep habarlaidy QazAqparat.
«Qazaqstannyń agroónerkásiptik kesheninde monitoring, taldaý jáne boljaý boiynsha biryńǵai tsifrlyq sitýatsiialyq ortalyq qurý máselesin pysyqtap jatyrmyz. Ol bizdiń ortalyqtyń bazasynda ashylyp, aýyl sharýashylyǵy salasynyń barlyq aqparattyq júiesin integratsiialaýdy kózdeidi», - dedi Tóleýtai Raqymbekov.
Ulttyq agrarlyq ǵylymi bilim berý ortalyǵynyń basshysy ókinishke orai Qazaqstan áli kúnge deiin AQSh aýyl sharýashylyǵy ministrliginiń boljamdy málimetterin paidalanatynyn jetkizdi. Onyń aitýynsha, tsifrlandyrý salasyndaǵy mamandar men qarapaiym sharýa qojalyq ielerin kezdestirip, fermerlerdiń bul baǵyttaǵy tájiribesin arttyrý kerek.
«Tsifrlandyrý salasynyń artyqshylyqtary sharýa ielerin artyq shyǵyndardan arylýǵa kómekteser edi», - dedi ol.
Aita ketsek, buǵan deiin Tóleýtai Raqymbekov otandyq agrarlyq ǵylymnyń basty problemalaryn ataǵan bolatyn. Onyń aitýynsha, bizdegi agrarlyq ǵylymnyń basty máselesi – bilim berý, transfert pen kommertsiialyq tehnologiialardy usyný boiynsha uiymdastyrý jumysynyń álsizdigi bolyp otyr.
