Aziiadaǵy ózara is-qimyl jáne senim sharalary keńesiniń Ǵulamalar keńesi quryldy. Mundai sheshim Syrtqy ister ministrleriniń 6-kezdesýinde qabyldandy, dep habarlaidy QazAqparat.
«Ǵulamalar keńesin qurý týraly qujat qabyldandy. Qurmetti áriptester! Aziiadaǵy ózara is-qimyl jáne senim sharalary keńesiniń jańa institýtynyń qurylýymen quttyqtaimyn. Bul - beibitshilik pen qaýipsizdikti qamtamasyz etýdi qosa alǵanda AÓISShK-ni damytýmen bailanysty suraqtardyń keń aýqymy boiynsha mańyzdy keńester beretin, AÓISShK qyzmetiniń munan arǵy baǵyttary men basymdyqtary retinde senim sharalaryn júzege asyratyn konsýltativtik organ. Qazaqstan osy sheshimderdiń barlyǵyn jedel júzege asyrýǵa kirisýge daiyn», - dedi kezdesýge tóraǵalyq etken QR Syrtqy ister ministriniń orynbasary Aqan Rahmetýllin.
Buǵan deiin QR Prezidenti Qasym-Jomart Toqaev Aziiadaǵy ózara is-qimyl jáne senim sharalary keńesi quryltaishysy kandidattaryna Nursultan Nazarbaev myrzany Ǵulamalar keńesiniń basshysy laýazymyna taǵaiyndaýdy usynǵanyn habarlaǵan edik.
«Kelesi qujat – bul Ǵulamalar keńesi týraly qujat. Biz ony búgin qabyldaýymyz qajet. Múshe memleketter konsýltativtik-keńes organyn qurýdy qoldady jáne qazirdiń ózinde múshelikke kandidattardy usyný bastalyp ketti. Búgin biz Ǵulamalar keńesi týraly erejeni bekitetin bolamyz. Búgin tańerteń bizben kezdesý barysynda Prezident Qasym-Jomart Toqaev Aziiadaǵy ózara is-qimyl jáne senim sharalary keńesi quryltaishysy kandidattaryna Nursultan Nazarbaev myrzany Ǵulamalar keńesiniń basshysy laýazymyna taǵaiyndaýdy usyndy. Sizder osy kandidatýrany qoldaisyzdar dep úmittenemin», - degen edi QR Syrtqy ister ministriniń orynbasary.
