Ótken táýlikte Qazaqstanda koronavirýs infektsiiasyn juqtyrǵany PTR testimen dáleldengen 2 122 naýqas tirkeldi. Bul – indet bastalǵaly bergi eń úlken kórsetkish.
Virýs juqtyrǵandardyń táýliktik kórsetkishi boiynsha elorda alda keledi. Nur-Sultanda Covid-pen 647 naýqas tirkeldi. Eldiń eń úlken qalasy – Almatyda juma kúni 438 adamǵa koronavirýs juqqan.
Aimaqtar arasynda Almaty oblysy birinshi orynda tur, munda diagnozy zerthanda rastalǵan 259 adam tirkeldi. Eń sońǵy orynda – Túrkistan oblysy, bul aimaqta 16 naýqas qosylǵan.
Qalalar men óńirler boiynsha tolyq derek:
- Nur-Sultan qalasy - 438,
- Almaty qalasy - 647,
- Shymkent qalasy - 66,
- Aqmola oblysy - 48,
- Aqtóbe oblysy - 137,
- Almaty oblysy - 258,
- Atyraý oblysy - 110,
- Shyǵys Qazaqstan oblysy - 42,
- Jambyl oblysy - 23,
- Batys Qazaqstan oblysy - 112,
- Qaraǵandy oblysy - 85,
- Qostanai oblysy - 35,
- Qyzylorda oblysy - 32,
- Mańǵystaý oblysy - 25,
- Pavlodar oblysy - 31,
- Soltústik Qazaqstan oblysy - 17,
- Túrkistan oblysy - 16.
3 sáýirdegi málimet boiynsha, 26 821 adam koronavirýs infektsiiasynan (25 362 KVI+ jáne 1 459 KVI-) emdelip jatyr.
Onyń ishinde 9 554 patsient - statsionarda, 17 267 naýqas ambýlatoriialyq deńgeide em qabyldaýda.
Koronavirýsqa shaldyqqandar arasynda:
• 377 adamnyń jaǵdaiy aýyr;
• 98 patsienttiń jaǵdaiy óte aýyr;
• 63 naýqas ÓJJ apparatynda jatyr.
Densaýlyq saqtaý ministrligi beisenbide PTR testi keri nátije kórsetse de, ózderi "koronavirýsqa uqsas pnevmoniiamen" aýyrǵan 70 naýqas tirkelgenin habarlady. Byltyr jazda Qazaqstanda ókpesi qabynǵandar sany kúrt artqan tusta Dúniejúzilik densaýlyq saqtaý uiymy muny koronavirýs taralýynyń saldary dep atap, qysym jasaǵan soń ǵana densaýlyq saqtaý ministrligi tamyzdan bastap mundai naýqastardy bólek eseptei bastaǵan. Degenmen, "pnevmoniia" qatty órshigen maýsym-shildeniń deregi statistikaǵa enbedi.
Ministrlik "koronavirýsqa uqsas pnevmoniiamen" aýyrǵandar deregin bir kún keshiktirip shyǵarady, bul eki statistikany qosyp esepteýde qiyndyq týǵyzady.
Onyń ústine, ministrlik Covid diagnozy zerthanada rastalǵandar men "soǵan uqsas pnevmoniiaǵa" shaldyqqandar deregin bólek sanaidy. Resmi derek boiynsha, byltyrǵy naýryzdan beri elde koronavirýs juqtyrǵan 251 053 adam tirkelgen, 222 606 patsinet jazylyp shyǵyp, 3 085 kisi osy dertten kóz jumǵan. Tamyzdan beri 50 765 adam "pnevmoniiaǵa" shaldyǵyp, 696 naýqas qaitys boldy.
Qazaqstannyń eki bólek deregin qosyp eseptegen amerikalyq Djons Hopkins ýniversitetiniń tujyrymy boiynsha, elde 299 myńnan astam adam Covid dertine shaldyqqan. Álemde 130 milliondai adam koronavirýs juqtyryp, 3,8 milliony osy aýrýdan kóz jumdy.
