Sybailas jemqorlyqqa qarsy is-qimyl agenttiginiń Preventsiia qyzmeti basshysynyń orynbasary Ǵanijan Asanuly densaýlyq saqtaý salasyndaǵy jemqorlyqqa jol ashatyn olqylyqtardy atady, dep habarlaidy QazAqparat.
«Ózderińiz biletindei, pandemiia densaýlyq saqtaýdyń kóptegen máselelerin, sonyń ishinde jemqorlyq táýekelderin kórsetti. Ótken jyly Áleýmettik meditsinalyq saqtandyrý qory men Densaýlyq saqtaý ministrliginiń ortalyq apparatynda taldaý jumystary júrgizilgen edi. Biyl Densaýlyq saqtaý ministrliginiń Meditsinalyq jáne farmatsevtikalyq baqylaý komiteti men Sanitariialyq-epidemiologiialyq baqylaý komitetinde syrtqy taldaýlar aiaqtaldy. Barlyǵy 138 jemqorlyq táýekel anyqtaldy, olar boiynsha 246 usynym ázirlendi», - degen agentik ókili anyqtalǵan olqylyqtardyń negizgilerine toqtaldy.
«Birinshi. «Maqsattyq kórsetkishterdiń jetilmegendigi» belgili boldy. «Patsientterdiń meditsinalyq kómek sapasyna qanaǵattanýy» nátijelerin «qolmen» ózgertý arqly burmalanýynyń joǵary táýekeli belgilendi. Bul densaýlyq saqtaý júiesiniń sapasy boiynsha obektivti kórinis bermeidi.
Ekinshi. Dári-dármektiń baǵasyn jasandy túrde kóterý táýekeli basym. Baǵa ótinish berýshiniń tekserilmegen aqparatyna nemese onyń kommertsiialyq usynysyna bailanysty qalyptasady. Dári-dármekterdiń baǵasyna olar bolmaǵan kezde de marketingtik shyǵyndardy qosýy múmkin. Qoldanystaǵy kóterme-bólshek saýda erejeleri baǵany 30%-ǵa qosymsha arttyrýǵa múmkindik beredi», - deidi Ǵanijan Asanuly.
Onyń aitýyna qaraǵanda, meditsinalyq qyzmetterdiń sapasyn baǵalaý úshin júrgizilgen 147 tekserý kezinde syrttan sarapshylar shaqyrylmaǵan.
«Saraptama qorytyndylaryn ýákiletti emes adamdar jasady. Oǵan «Halyq densaýlyǵy jáne densaýlyq saqtaý júiesi týraly» kodeks pen zańǵa táýeldi akti arasyndaǵy qaishylyq sebep bolǵan.
Epidemiologiialyq monitoring jáne kameraldyq baqylaý salasy tsifrlandyrylmaǵan. 600 mln teńgege satyp alynǵan planshetter men mobildi printerler ákimshilik praktikany avtomattandyrý úshin paidalanylmaidy. Baqylaý qujattary qolmen qalyptastyrylady, bul sybailas jemqorlyqqa jaǵdai jasaidy», - dedi agenttiń ókili.
Joǵaryda kórsetilgen sybailas jemqorlyq táýekelderi boiynsha usynystar ázirlenip, Densaýlyq saqtaý ministrligine joldandy.
