Foto:depositphotos.com
Arnaiy HQKO-larǵa júrgizilgen jemqorlyqqa qarsy monitoring nátijeleri boiynsha biýdjetke túsetin túsimder 10,6 milliard teńgeden 91,3 milliard teńgege deiin ulǵaidy, - dep habarlaidy «Ult aqparat» Antikorǵa silteme jasap.
Antikor málimetinshe, sybailas jemqorlyqqa qarsy monitoring nátijeleri boiynsha avtomobilderdi tirkeý jáne júrgizýshi kýálikterin berý kezinde jemqorlyq táýekelderi anyqtalǵan.
"2011 jyldan beri qoldanylyp kele jatqan avtokólikti tirkeý júiesi ádiletsiz qyzmetkerlerdiń jalǵan derekter engizip, jalǵan qujattar berýge jaǵdai týǵyzyp, jemqorlyqqa jol bergen.
Agenttik 3 jyl ishinde 23 qylmystyq isti tergedi. 3 myńnan asa zańsyz kólik esepke qoiylyp, 60 myń júrgizýshi kýáligi zańsyz berildi. Ýákiletti organdarǵa tiisti usynymdar engizilip, olardyń bir bóligi iske asyryldy", - delingen habarlamada.
Arnaiy HQKO men IIM-de avtokólikti tirkeý boiynsha jańa aqparattyq júieler iske qosylǵan. Ótinimderdi resimdeý jáne qaraý kezinde derekterdi túzetý úshin múmkindikter alyp tastalǵan. Endi tek ákimshilik politsiia komiteti ózgerister engize alady.
"Ótinimderdi tirkeý rásimi jeńildetildi. Endi bul úshin tek JSN engizý qajet, al qalǵan derekter basqa aqparattyq júielerden avtomatty túrde toltyrylady. Bul rette júieniń ózi ekinshi deńgeidegi bankterdiń túbirtekterin, mindetti tólemderin jáne aiyppuldaryn tóleýdi tekseredi".
2022 jyly 9,4 myń avtokólikti tirkegeni úshin 10,6 milliard teńge jinalǵan, 2023 jyly zańdastyrýdy eskere otyryp, 10,2 myń avtokólikti tirkegen kezde 91,3 milliard teńge túsken. Atalǵan táýekelderdi joiý nátijesinde byltyr biýdjetke túsken túsim 9 esege ulǵaidy.
"Kompiýterlerge qashyqtan qoljetkizý arqyly tulǵalardy aýystyrý jáne emtihan nátijeleri arqyly júrgizýshi kýálikterin berý protsesinde eleýli jemqorlyq táýekelderi anyqtaldy. Agenttiktiń usynymdary boiynsha mindetti biometriia jáne qoǵamdyq baqylaý úshin tikelei efirde beinetirkeý syndy baqylaý sharalary engizildi.
Emtihandardy qaita tapsyrý rásimderi retteldi. Qaita tapsyrý sany eki retke shektelip, al óte almaǵan jaǵdaida 3 aidan keiin nemese tyiym salynǵan zattardy paidalanǵan jaǵdaida 6 aidan keiin tapsyrady", - delingen habarlamada.
Jańa aqparattyq júielerdi engizýdiń arqasynda emtihandardy tapsyrǵan syńai tanytý táýekelderin edáýir azaitýǵa múmkindik týǵan.
"Jalpy, jańa aqparattyq júielerdi engizý osy saladaǵy barlyq qyzmetke oń áserin tigizdi. Búginde agenttik júrgizýshi kýálikterin alý jáne kólikti tirkeý rásimderine qoǵamdyq monitoring júrgizýdi uiymdastyryp jatyr. Bul jumysqa jemqorlyqqa qarsy eriktiler tartyldy".
Sondai-aq, 2023 jylǵy jeltoqsanda HQKO qyzmetkerlerin jemqorlyq sýbektilerine jatqyzýǵa qatysty zańnamaǵa mańyzdy túzetýler engizilgeni aityldy. Bul ózgerister 2025 jylǵy qańtardan bastap kúshine enedi.
Túzetýler qyzmetkerler tarapynan teris qylyqtar men quqyq buzýshylyqtardyń aldyn alýǵa jáne azamattardyń quqyqtaryn qorǵaýǵa baǵyttalǵan.
