Túrkiianyń Antaliia provintsiiasyndaǵy orman órtinen 3 adamnyń kóz jumǵany belgili boldy. Jalpy tilsiz jaýdan zardap shekken 122 adamnyń 58-i aýrýhanaǵa jetkizilgen. Bul týraly Anadoly agenttigi habarlady.
AFAD (Túrkiia Respýblikasy Úkimetiniń janyndaǵy tótenshe jaǵdailardyń aldyn alý jáne saldaryn joiý basqarmasy) málimeti boiynsha, órt 28 shildede túski kezinde Antaliia provintsiianyń tórt aimaǵynda órt shyqqan. Órttiń jyldam taralýyna aptap ystyq pen jeldi aýa-raiy yqpal etken. Órtti aýyzdyqtaýǵa órti sóndirý aviatsiiasy men qurlyqtaǵy tótenshe jaǵdaimen kúres qyzmetteri jumyldyrylǵan.
Órt saldaryn joiýǵa 1 ushaq, 19 tikushaq, 1 pilotsyz ushý apparaty, 192 órt sóndirý mashinasy, 30 qurylys tehnikasy, 19 jedel járdem mashinasy, 5 dala ashanasy jáne jeke quramnyń 1000-nan astam adamy tartylǵan.
«Jalynnyń jolynda qalǵan 18 eldi mekenniń turǵyndary qaýipsiz jerge kóshirildi. Manavgat aýdanyndaǵy jaǵdai baqylaýǵa alyndy, biraq Aqsekide órt basylǵan joq», - dedi Túrkiianyń Aýyl sharýashylyǵy jáne orman sharýashylyǵy ministri Bekir Pakdemirli.
«Anadoly» agenttiginiń jazýynsha, órt sóndirýshilerdi ýaqytsha turaqpen qamtamasyz etý úshin 1 300 adam syiatyn 6 jataqhana daiyndalǵan.
Jergilikti politsiia men qutqarý qyzmetteri óńirde órt qaýpi áli seiilmegenin eskertip jatyr.
Qaýipti aýmaqtarǵa kiretin avtokólik joldary jabylyp, qozǵalys shektelgen. Apat aimaǵyn ainalyp ótetin balama joldar ázirlenip jatyr.
Manavgat aýdanynyń gýbernatory Mustafa Igit Oimapynar bógetine túsip ketken 10 azamat qutqarylyp, qaýipsiz jerge jetkizilgenin aitqan.
Al búgin Túrkiianyń Marmaris jáne Milas atty týristik qalalarynda ormandy-dala alqaptar órtendi. Ony joiý jáne tabiǵi apattan zardap shekkenderdi izdestirý-qutqarý jumystary bastalyp ketti.
