Jýyrda anasynan aiyrylǵan Anna Danchenko qartaiǵan ata-anaǵa qamqor bolý týraly oiyn bólisti. Ol jas otbasynyń bólek turýyn qoldaitynyn, alaida muny ata-anany qaraýsyz qaldyrýmen shatastyrmaý keregin aitty, dep habarlaidy ult.kz.
Danchenkonyń jazbasyna efirde Aijan esimdi qatysýshynyń bolashaqta uly bólek turýdy qalasa, qarsy bolmaityny týraly pikiri sebep bolǵan. Onyń aitýynsha, ata-ananyń kúsh-qýaty bar kezde jastardyń óz aldyna shańyraq kóterip, otbasylyq jaýapkershilikti sezingeni durys.
Alaida jasy ulǵaiyp, kútimge muqtaj bolǵan adamnyń jaǵdaiy bólek ekenin jetkizdi.
“Jasy 80-ge kelgen adamǵa qaraý — jai ǵana birge turý emes. Úlken kisiniń kóńilin tabý, tamaǵyn berý, kútimin jasaý, qajet kezinde janynan tabylý bar. Ondai jasta er balanyń ǵana emes, kelinniń de kómegi óte qajet bolady”, – dep jazdy ol.
Oqyrmandardyń “Qyzy ǵana bar analarǵa kim qaraidy?” degen saýalyna da jaýap bergen. Danchenkonyń pikirinshe, mundai jaǵdaida qyzy men kúieý balasy qamqorlyq tanytýy kerek. Ol mindetti túrde bir úide turý shart emes ekenin, eń bastysy, úlken kisini jalǵyz qaldyrmai, jaǵdaiyn jasaý keregin atap ótti.
Jazba avtory óz otbasyndaǵy jaǵdaidy da mysalǵa keltirdi. Aǵasy men jeńgesi bolǵanymen, ata-anasy jas otbasynyń bólek turǵanyn qup kórgen. Al ákesi qaitys bolǵannan keiin anasyn ózi qasyna alǵan.
“Anam tórt jyl tósek tartyp jatty. Ári qarai túsinersizder… Biraq ol — meniń Anam. Oǵan qyzmet etý, janynda bolý, perzenttik paryzymdy oryndaý, batasyn alý — men úshin budan asqan baqyt joq”, – dep bólisti Danchenko.
Ol anasynyń “Alla kúnińdi eshkimge qaratpasyn…” degen sózin qazir burynǵydan da tereń túsinetinin jazdy. Adamnyń qartaiǵanda qandai jaǵdaida bolaryn eshkim aldyn ala bilmeitinin eske saldy.
“Balaǵa erkindik berý kerek. Óz otbasyn qursyn, bólek tursyn, óz ómirin súrsin. Biraq qandai jaǵdai bolsa da, ata-anasyn eshqashan qaraýsyz qaldyrmasyn”, – dep túiindedi ol.
Aita keteiik, Anna Danchenko anasynyń qazasynan keiin jan syryn aqtardy.
Anna Danchenko kim?
Anna Danchenko – qazaqstandyq jýrnalist, telejúrgizýshi, prodiýser ári oqytýshy. Televiziiadaǵy eńbek jolyn 2006 jyly Aqtóbedegi “RIKA TV” arnasynda “Araily tań” baǵdarlamasyn júrgizýden bastaǵan. Balalarǵa til úiretýge arnalǵan “Ainalaiyn” baǵdarlamasynyń avtory ári júrgizýshisi bolǵan.
2009–2019 jyldary “31 arnada” tilshi, “Informbiýro” jańalyqtarynyń júrgizýshisi jáne televiziialyq jobalardyń prodiýseri bolyp jumys istegen. Kórermenge “Aita bersin”, “Juldyzdy shańyraq”, “Sát sapar” baǵdarlamalary arqyly tanys. 2019 jyly Anna Danchenko Production kompaniiasyn qurǵan. 2026 jyldyń qyrkúieginen bastap “QosLike” baǵdarlamasyn júrgizedi.
Anna aǵylshyn jáne nemis tilderi boiynsha joǵary bilim alǵan. Ál-Farabi atyndaǵy Qazaq ulttyq ýniversitetinde shetel filologiiasy mamandyǵy boiynsha magistratýrany úzdik aiaqtaǵan. 2011 jyldan beri osy ýniversitette ǵylymi-pedagogikalyq qyzmetpen ainalysady. “Shapaǵat” medalimen marapattalǵan.
