Qazaqstannyń Túrkiiadaǵy Elshiliginiń uiymdastyrýymen Keńes Odaǵynyń batyry, Ekinshi dúniejúzilik soǵystyń dańqty qolbasshysy, áskeri strateg jáne belgili jazýshy Baýyrjan Momyshulynyń 111 jyldyǵyna orai túrik ǵalymy Ashýr Ózdemirdiń «Túrkistannyń ot balasy Baýyrjan Momyshuly» atty kitabynyń tusaýkeseri ótti, dep habaplaidy QazAqparat.
Is-sharaǵa túrik ziialy qaýym ókilderi, qazaq jáne túrik stýdentter men BAQ ókilderi qatysty.
Jiynda sóz sóilegen Elshi Abzal Saparbekuly biyl Qazaqstan Táýelsizdiginiń 30 jyldyq mereitoiy ekenin jáne elimizdiń egemendigin alǵash bolyp moiyndaǵan baýyrlas Túrkiianyń ornynyń erekshe ekenine tilge tiek etti.
Osyǵan bailanysty Elshi Túrkiiada kóptegen is-sharalardyń ótkizilgenin eske salyp, búgingi is-sharanyń da táýelsizdik mereitoiyna jáne qazaqtyń birtýar batyry ári jazýshysy Baýyrjan Momyshulynyń rýhyna taǵzym jáne onyń 111 jyldyǵyna tartý ekenin atap ótti.
Abzal Saparbekuly mundai is-sharalardyń mádeniet pen ádebietti damytýda erekshe oryn alatynyn jáne eki el arasyndaǵy baýyrlastyqty odan ári damytatynyn aitty.
«Baýyrjan Momyshuly Keńes odaǵy azamaty jáne Qyzyl armiia qolbasshysy. Degenmen de ol ómir boiy ulttyq bolmysyn saqtap, ulttyq rýhyn biik kóterip ótken óz halqynyń bel balasy. Sondyqtan ol sol kezeńde jappai qoldanylatyn – ov jurnaǵyn tegine almai, uly sózin qoldanyp, «Momyshuly» tegin maqtanyshpen alyp júrgen naǵyz qaharman», - deidi ol.
Shara barysynda «Túrkistannyń ot balasy Baýyrjan Momyshuly» atty kitabynyń avtory belgili ǵalym, túrik tili men ádebietiniń oqytýshysy jáne aýdarmashy Ashýr Ózdemir Túrkistannyń júregi - Qazaqstan memleketiniń tarihyna, onyń mádenieti men ádebietine toqtaldy.
Ál-Farabi, Ahmet Iassaýi, Abai, Balasaǵun siiaqty uly danalardyń mekeninde dúniege kelgen Baýyrjan Momyshulynyń kim bolǵany, onyń ómiri, soǵys kezindegi bastan keshirgen oqiǵalary men soǵystan keiingi jazýshy retindegi ómiri týraly keńinen baiandady.
«Túrkistannyń ot balasy Baýyrjan Momyshuly» atty kitap úsh bólimnen jáne sońǵy sózden turady.
Birinshi bólimde Baýyrjan Momyshulynyń otbasy, balalyq shaǵy, mektep shaǵy men áskerlik ómiri, ásker sońyndaǵy ómiri, boiyndaǵy adami qasietteri týraly baiandalady.
Ekinshi bólimde Baýyrjan Momyshulynyń túigen oi-pikirleri, qazaq ádebieti týraly kózqarastary jáne ádebi aýdarmalar men tilge jáne qazaq tarihyna, otansúigishtik jáne ultjandylyq, ana men otbasy týraly oi-pikirleri aitylady. Sonymen qatar, bul bólimde kommýnistik partiia, kommýnizm, Lenin men Stalin, Keńes odaǵy týraly batyrdyń oi-pikirlerine oryn berilgen.
Úshinshi bólimde ómiriniń ádebietke bailanysty kózqarastary, jazǵan shyǵarmalary, áskeri shyǵarmalar, óleńderi, maqal-mátelder, jazǵan hattar, maqalalary men gazetke shyqqan maqaqalary, áskeri estelikteri, saiahattary, roman, oqiǵalar, áńgimeleri baiandalady.
Is-shara barysynda B.Momyshulynyń óz daýsymen túsirilgen qysqasha derekti film kórsetildi. Jinalǵan qaýym bul filmnen tereń áser alyp, Baýyrjan Momyshulyn odan ári tani tústi.
