Ál-Farabi atyndaǵy Qazaq ulttyq ýniversitetiniń Basqarma Tóraǵasy – Rektory Janseiit Túimebaev Ankara áleýmettik ǵylymdar ýniversitetiniń rektory Mýsa Kazim Arydjanmen kezdesti.
Kezdesýde taraptar eki ýniversitet arasynda áriptestik bailanys pen ózara túsinistik týraly kelisimge qol qoidy. Onda bilikti kadrlardy daiarlaý, stýdent jáne oqytýshylar almasý, ǵylymi baǵytta birlesip zertteýler júrgizý, seriktestikti damytý sharalary kózdelgen.
Júzdesýde ýniversitet basshysy Janseiit Túimebaev baýyrlas elder arasyndaǵy ózara tyǵyz yntymaqtastyqtyń joǵary deńgeide ekenin atap ótip, QazUÝ-dyń jetistikteri men aldaǵy josparlary týraly aitty.
«QazUÝ – Ortalyq Aziiadaǵy kóshbasshy ýniversitet. 2022 jyly Ystambul ýniversitetinde QazUÝ filialy ashyldy. Ýniversitette 1996 jyldan beri TÚRKSOI kafedrasy tabysty jumys istep keledi. Túrkiianyń joǵary oqý oryndarymen seriktestik kún sanap artyp keledi. Búgingi kelisim aldaǵy ýaqytta Ankara áleýmettik ǵylymdar ýniversitetimen yntymaqtastyqty arttyrýǵa, birlesip jumys isteýge zor múmkindik beredi dep senemin», – dedi Janseiit Túimebaev.
Búginde Ál-Farabi atyndaǵy QazUÝ Túrkiianyń 45 joǵary oqý ornymen seriktestik ornatqan. 2022/23 oqý jylynda ýniversitettiń 17 stýdenti akademiialyq utqyrlyq baǵdarlamasy boiynsha Túrkiianyń joǵary oqý oryndarynda oqyp keldi. Oqý ordasynyń 36 oqytýshysy, 81 PhD doktory jáne 20 magistr Túrkiiaǵa arnaiy baryp, taǵylymdamadan ótti. Sondai-aq QazUÝ-dyń 100-den astam oqytýshysy men qyzmetkeri eki jyl qatarynan, iaǵni 2021 j. jáne 2022 j. Antaliia bilim ýniversitetine arnaiy baryp, kásibi biliktiligin arttyryp, tájiribelerimen bólisip qaitqan bolatyn. Biylǵy jańa oqý jylynda QazUÝ-ǵa Túrkiianyń 66 stýdenti qabyldandy.
Óz kezeginde Ankara áleýmettik ǵylymdar ýniversitetiniń rektory Mýsa Kazim Arydjan eki ýniversitet arasyndaǵy yntymaqtastyqty damytýǵa kúsh-jigerin salatynyn atap ótip, barlyq bastamalardy qoldaitynyn jetkizdi.
«Qazaqstan biz úshin asa mańyzdy oryn alady. Táýelsizdik alǵan sátten bastap elder arasynda berik dostyq qatynastar damyp keledi. QazUÝ men Ankara áleýmettik ǵylymdar ýniversiteti arasyndaǵy dostyq jańa kezeńge kóterildi. Osyǵan bailanysty biz seriktestiktiń jańa baǵyttaryna árdaiym ashyqpyz», – dep atap ótti meiman.
Qaragóz SIMÁDIL,
ál-Farabi atyndaǵy QazUÝ-diń
Baspagerlik, redaktorlyq jáne dizainerlik óner kafedrasynyń oqytýshysy
