Túrkiia syrtqy ister ministrligi AQSh-tyń Ankaradaǵy elshisi Devid Satterfildty shaqyrtyp, AQSh prezidenti Djo Baidenniń Osman imperiiasyndaǵy armian genotsidin moiyndaý týraly sheshimine pikir bildirdi, dep habarlaidy Azattyq.
"Túrkiia Ankaradaǵy elshini shaqyrtyp, Baidenniń 1915 jylǵy oqiǵaǵa bergen baǵasyn joqqa shyǵaratynyn aitty" dep jazdy Bloomberg.
Osyǵan deiin Túrkiia syrtqy ister ministri Mevliýt Chavýshoglý Ankaranyń "popýlizmge ǵana súienip jasalǵan bul málimdemeni tolyqtai joqqa shyǵaratynyn" málimdegen.
"Óz ótkenimiz týrasynda ózgelerden úirener eshnárse joq" dep jazdy túrik ministri Twitter-de.
Al osy arada amerikalyq armiandar kóshege shyǵyp, Osman imperiiasyndaǵy armian genotsidin moiyndaǵan Djo Baidenge qoldaý bildirdi.
Associated Press agenttiginiń habarlaýynsha, adamdar Beverli-Hillzdegi (Kaliforniia) Túrkiia konsýldyǵy aldyna da jinalǵan. Kóbi Armeniia týyn ala kelgen. Sherýshiler negizgi kóshedegi qozǵalysty buǵattap, Ankaradan genotsidti moiyndaýdy talap etti. Taǵy bir top Kaliforniia shtatynyń Montebello qalasynda jiyn ótkizdi.
Associated Press agenttiginiń jazýynsha, Kaliforniia – amerikalyq armiandar eń kóp shoǵyrlanǵan shtat. AQSh-tan armian genotsidin moiyndaýdy talap etip kelgen de osy shtattyń qoǵamdyq qairatkerleri edi.
Senbi, 24 sáýirde AQSh prezidenti Djo Baiden Osman imperiiasyndaǵy armiandardyń jappai óltirilýin jáne deportatsiiasyn genotsid dep moiyndaitynyn málimdedi. Baidenge deiingi AQSh prezidentteri bul oqiǵany genotsid dep atamaǵan.
1915–16 jyldary Osman imperiiasy aýmaǵynda bir jarym millionǵa jýyq armian mert bolǵan. Zertteýshilerdiń aitýynsha, olardyń kóbi biliktiń buiryǵymen óltirgen. Ankara bul tujyrymmen kelispeidi, armian halqyn qasaqan óltirý saiasaty bolmady deidi.
AQSh-tyń burynǵy prezidenti Barak Obama birinshi merziminiń aldynda armian genotsidin moiyndaýǵa ýáde bergen. Biraq ýádesinde tura almady. Ekinshi merzimi aiaqtalǵanda bul týraly ókinetinin aitty. Djo Baiden Obama biligi tusynda vitse-prezident bolǵan.
Armian genotsidin moiyndaityn elder sany otyzdan asyp otyr. Olardyń arasynda Resei de bar. Frantsiia men Shveitsariia sekildi elderde armian genotsidin joqqa shyǵarýǵa tyiym salatyn zańdar qabyldanǵan.
