Germaniia Federaldy kantsleri Angela Merkel qyzmetinen ketkennen keiin ai saiyn shamamen 15 myń eýro zeinetaqy alady. Mundai derekti GFR Salyq tóleýshiler odaǵy jariialady, - dep habarlaidy Tengrinews.kz tilshisi DW.com portalyna silteme jasap.
Uiym málimetinshe, mundai zeinetaqy Merkelge býndestagtaǵy, ministrler kabinetinde jáne úkimet basshysy qyzmetindegi kóp jyldyq jumys ótiline bailanysty taǵaiyndalǵan.
Germaniiada zeinetaqy alý quqyǵy, ony taǵaiyndaý jáne esepteý tártibi zańmen retteledi. Merkeldiń Parlamenttegi qyzmeti úshin zeinetaqy býndestag depýtattary týraly zańǵa sáikes, al úkimettegi jumysy úshin federaldy ministrler týraly zańǵa sáikes esepteledi. Býndestag depýtattary týraly zańnyń 20-tarmaǵyna sáikes, mysaly, ol jalaqynyń 65 paiyzy mólsherinde maksimaldy zeinetaqy alýǵa quqyly, óitkeni onyń parlamenttegi jumys ótili - 31 jyl.
Germaniia úkimetiniń burynǵy basshylary men Germaniia prezidentteri siiaqty, Merkeldiń de óz keńsesi men keńse menedjeri, eki assistent, hatshy jáne júrgizýshi siiaqty qyzmetkerleri bar.
Eske salaiyq, 25 qyrkúiekte Germaniiada býndestag sailaýy ótedi, sodan keiin úkimetti jańa kantsler basqarady. Bul laýazymdy 16 jyl boiy atqarǵan Angela Merkel 2018 jyldyń qazanynda Hristian-demokratiialyq odaqtyń tóraǵasy qyzmetinen bas tartty, ol úkimet basshysy laýazymyna qaita úmitker bolmaidy.
