Senattyń jalpy otyrysynda depýtat Andrei Lýkin AÓK-ti sýbsidiialaý erejesin qaita qaraýdy usyndy, dep habarlaidy "Ult aqparat".
Onyń aitýynsha, agrarlyq salaǵa bólinetin sýbsidiialar tiimsiz jáne maqsatsyz jumsalýda. Jalǵan kelisimsharttar jasalyp, shyndyqqa janaspaityn aqparattardyń beriletini de jasyryn emes. Sonyń saldarynan qarajat jelge ushyp jatyr. Senator Andrei Lýkin jaǵdaidy jaqsartý úshin qazirgi erejelerdi qaita qaraýdy usyndy. Ol óz usynystaryn Premer-Ministrdiń orynbasary Roman Skliardiń atyna joldaǵan depýtattyq saýalynda baiandady.
Senatordyń sózine qaraǵanda, sońǵy 5 jylda jeńildikpen beriletin nesie men sýbsidiiaǵa 2,9 trln teńge bólingen. Alaida, sýbsidiiany berý mehanizmi jabyq kúide qalyp otyr jáne erejeleri de jetildirýdi qajet etedi. Dál osy sebepten bul salada sybailas jemqorlyq faktileri jii tirkelýde.
«2018 - 2020 jyldar ishinde memlekettik baǵdarlamany iske asyrýǵa qatysty 144 qylmystyq is tergelgen eken. Onyń ishinde sybailas jemqorlyq qylmystary boiynsha 57 is qozǵalǵan. Al sýbsidiiany jymqyrý boiynsha 87 sotqa deiingi tergeý júrgizilgen. Saldarynan memleketke 2,1 milliard teńgeden astam shyǵyn keltirildi», – dedi Andrei Lýkin.
Sonymen qatar Senat depýtaty usynylǵan aqparattar men derekterdiń durystyǵyna tek aýyl sharýashylyǵy óndirýshileri jaýapty ekenine nazar aýdardy. Al jaýapty laýazymdy tulǵalar sharýalardyń ótinimderin qysqa merzimde qarap, derekterdiń tolyq ekenine ǵana kóńil bóledi.
«Osyǵan orai agroónerkásiptik keshendi sýbsidiialaý erejelerin qaita qaraǵan jón dep esepteimin. Sol arqyly aýyl sharýashylyǵy óndirýshileriniń ótinimderin tekserý boiynsha jergilikti atqarýshy organdardyń jáne sýbsidiia tólemderin júrgizetin jaýapty laýazymdy tulǵalardyń mindetterin qarastyrý qajet», – dedi Andrei Lýkin.
