Foto: videodan skrinshot
Jetisý oblysynyń Nurkent aýylynda balasyn jylý batareiasyna bailap, bar kúshimen uryp-soqqan áieldiń eki balasy Taldyqorǵanda balalar mekemesine ornalastyryldy, dep habarlaidy Ult.kz.
Belgili bolǵandai, tórt jáne eki jastaǵy eki ul qazir oblys ortalyǵyndaǵy balalar mekemeleriniń birinde ornalastyrylǵan. Bul týraly Jetisý oblysynyń bala quqyqtary jónindegi ýákili Ermek Eginbaev málimdedi.
"Balalar qazir Taldyqorǵanda, qaýipsiz jerde. Olarǵa qajetti kútim men barlyq jaǵdai jasalǵan: oiynshyqtar, tamaq bar. Búgin men baryp, eki balamen de kezdestim. Ózderin jaqsy sezinip otyr. Olarǵa tárbieshiler men dárigerler, sonyń ishinde logoped pen psiholog tiisti deńgeide qarap jatyr. Olardyń bolashaq taǵdyryna qatysty másele sheshilýde jáne baqylaýda. Biz óz tarapymyzdan bul protseske tikelei qatysyp, jaǵdaidy qatań qadaǵalap otyrmyz", – dedi bala quqyqtary jónindegi ýákil.
Eske salsaq, buǵan deiin qazaqstandyq áiel óz balasyn jylý batareiasyna bailap, aiaýsyz uryp-soqqany týraly jazǵan edik. Oqiǵanyń videosy jelide taraǵannan keiin balasyn aiaýsyz urǵan áiel ýaqytsha ustaý izoliatoryna qamaldy.
