Áli anasynyń "sáttilikke" qatysty aitqan sózi týraly oiyn aitty.
"Sáttilikke qatysty, kez kelgen adamnyń ómirinde sáttilik úlken rol atqarady. Imanbektiń jaǵdaiynda da sol. Aitpaqshy, bul týraly ózi de aitqan bolatyn. Ol bir suhbatynda bastapqyda jai remiks jasap, ony "VKontakte" jelisine júktep, birneshe ýaqyttan keiin bir pablik ony kórip, sosyn tarai bastaǵanyn aitqan. Iaǵni ol pablik remiksti baiqamaǵanda ne bolar edi? Odan bólek Jelide óz tyńdarmanyn taba almai júrgen qanshama myqty remiks bar? Sondyqtan bul jerde sáttilik fakti de bar. Ol keremet qoi. Jalpy aitqanda Imanbektiń baǵy bar. Odan bólek, Roses remiksi "Gremmisiz" de álemdik hitke ainaldy dep esepteimin", - deidi Áli.
Áli Oqapov anasy Roza Rymbaeva mundai málimdemeni búkil el aldynda jasaǵany durys bolmaǵanyn aitty.
"Biraq ol da óz pikirin aitýǵa quqyǵy bar. Sizder de óz pikirińizdi aitýǵa quqyǵyńyz bar jáne 60-tan asqan áieldiń zamanaýi klýb mýzykasyn túsinbeýi qalypty jaǵdai. Únemi solai bolatyn. Bizdiń ata-anamyz da "Ne tyńdap otyrsyń? Bul ne? Bul mýzyka emes qoi" dep te aitatyn. Biz de bir kezde jańa tolqyndy túsinbeitin kezge jetemiz. Shyny kerek, qazirdiń ózinde jańa mýzyka áýenderin túsinbei jatamyn. Biraq ol qalypty jaǵdai. Ol ómir ǵoi. Olar ony túsinbegeni úshin kináli emes. Sebebi olardyń kezinde bári basqasha bolatyn. Olar ótken kezeńniń adamdary. Olar basqasha tárbielengen, olarǵa bári basqasha túsindirilgen, olardaǵy standart basqasha bolatyn, kýmiri basqa bolatyn", - dedi ánshi.
Eske salaiyq, jaqynda ánshi Roza Rymbaeva Azattyq Rýhy portalyna bergen bolatyn. Suhbat barysynda ol Imanbek Zeikenovtiń ónerine bailanysty pikir bildirip, ol "sáttilik" qana dep ataǵan edi.
"Kerek kezde, kerek jerde bolý. Joly bolyp ketti. Onyń ústine ol kásibi mýzykant emes. Bul jai ǵana sáttilik. Yrǵaǵyn, mánerin aýystyrdy da qoidy, munyń bári kompiýterde jasalady. Ony remix retinde baǵalady, avtor retinde nemese oryndaýshy, avtor-óńdeýshi retinde emes. Joq, ol tek jyldamdyǵyn údetip, balalarǵa tán án shyǵyp, yrǵaǵy aýysty", - degen edi Rymbaeva.
Artynsha Imanbek Roza Rymbaevanyń sózine jaýap bergen edi.
"Birinshiden, ol men úshin eresek adam, aǵa býyn, men ony eshqashan synamaimyn. Qalai aitarymdy da bilmeimin. Men daýlaspaimyn, bul onyń pikiri. Tyńdap, túsindim", - dedi Imanbek.
