Soltústik Qazaqstan oblysynda Taiynsha aýdandyq aýrýhanasynyń direktory ana ólimine qatysty iste basy daýǵa qalyp, óz erkimen jumysynan ketti, dep habarlaidy QazAqparat.
SQO densaýlyq saqtaý basqarmasynyń basshysy Nurlan Aimanov jas ana Áigerim Qazezovanyń ólimin bir ai boiy jasyrýǵa ne sebep túrtki bolǵanyn jáne osy faktige qatysty qandai sharalar atqarylǵanyn baspasóz máslihatynda aitty.
Esterińizge salaiyq, Taiynsha aýdany Bolshoi Iziým eldi mekeniniń 34 jastaǵy turǵyny Áigerim Qazezova oblystyq kópsalaly aýrýhanaǵa koronavirýs juqtyryp túsedi.
Júkti kelinshekti jaǵdaiy nasharlai bastaǵasyn dárigerler kesar tiligi arqyly bosandyryp alady. Biraq ol birneshe kúnnen keiin 22 tamyzda ókpeniń qabynýynan oblystyq aýrýhanada kóz jumady. Emdeý mekemelerindegi «bylyq» osydan keiin bastalǵan. Jas ananyń ólimin jasyrý úshin aýrýhana mamandary Qazezovany qaǵaz júzinde Taiynsha aýrýhanasyna aýystyrǵan. Ol jerde bir ai boiy «emdegen». Máiitti týystaryna 22 tamyz kúni bergenimen, qaitys bolǵany týraly qujattardy marqumnyń kúieýi tek bir aidan keiin alǵan.
Dárigerlerdiń ana ólimin jasyrýyna qatysty táýelsiz komissiia qurylyp, olar isti búge-shigesine deiin tekserdi. Sarapshylar eki meditsinalyq mekemeniń 10-ǵa jýyq qyzmetkeriniń zańsyz áreketin áshkereledi.
