AN-2 ushaǵynyń komandiri Tahir Ótegenov ushý barysynda ne bolǵanyn jáne nelikten apattyq jaǵdaida qoný týraly sheshim qabyldaǵanyn aityp berdi, dep habarlaidy "Ult aqparat".
«2021 jylǵy 26 aqpanda Boraldai-Kegen baǵytynda ushyp shyǵyp, jerden 50 metr biiktikke kóterilgende qozǵaltqyshtyń qýatyn joǵaltqanyn jáne ushaqtyń tómendei bastaǵanyn baiqadym. Ushyp shyqqan áýejaiǵa oralý úshin ushaqty jailap bura bastadym. Bortta jolaýshylardyń bolýyna jáne eldi mekenderdiń ústinen ótip bara jatqanymyzǵa bailanysty qonýǵa bolatyn aýdandy barynsha baǵdarlaýǵa tyrystym. Boraldai áýejaiynyń jolaǵyna túsý úshin kedergilerden óte bergen kezde ushaq biiktik joǵaltyp jerge soǵyldy. Bortta bolǵan jolaýshylardyń barlyǵy, ekipaj músheleri din-aman», - dedi Tahir Ótegenov QR Indýstriia jáne infraqurylymdyq damý ministrliginiń Telegram-paraqshasynda jariialanǵan videoda.
Esterińizge sala keteiik, 26 aqpanda Boraldai-Kegen baǵyty boiynsha sanitarlyq reisti oryndaǵan «Aziia Kontinental» áýe kompaniiasynyń AN-2 áýe kemesi Boraldai avtojolynyń shyǵysyna qarai 1,5 shaqyrym jerde májbúrli túrde qondy.
Bortta 5 adam bolǵan. Qaza tapqandar men zardap shekkender joq.
QR IIDM Aviatsiialyq oqiǵalar men intsidentterdi tekserý basqarmasy bolǵan jaǵdaidy tekserip jatyr.
