Álemdik boks jankúierleri Gennadii Golovkinniń ulttyq naqyshtaǵy shapapyna tamsana qaraityny qýantady. Bul týraly búgin Ortalyq kommýnikatsiialar qyzmetinde ótken baspasóz máslihatynda Mádeniet jáne sport ministri Arystanbek Muhamediuly aitty.
«Barlyq álem chempionattarynda, Olimpiada oiyndarynda sportshylardyń epikirovkasyna basa mańyz beriledi. Men ózimizdiń dizainerlerge, sporttyq kiimderdi tigetin kompaniialarymyzǵa zor alǵysymdy bildirgim keledi. Qazaqstan quramasy shyqqan kezde jankúierlerdiń zor qurmetine ie bolatyndyǵyn kóremiz. Sondai-aq ózge elderdiń sportshylary da Qazaqstanda kiimniń dizainy jaqsy damyǵanyn alǵa tartyp, maqtaýyn jetkizip jatady», - deidi Arystanbek Muhamediuly.
Sonymen birge, ministr qazaqy naqyshtaǵy kiimge adal Gennadii Golovkinge alǵysyn bildirdi.
«Men aty ańyzǵa ainalǵan Gennadii Golovkinge rahmet aitqym keledi. Ol ringke mindetti túrde ulttyq naqyshtaǵy shapanmen shyǵady. Aiqas aiaqtalǵannan keiin mindetti túrde qaitadan shapanyn kiip qaitady. Bizdiń ulttyq kiimdi kórgen kezde keýdemizdi maqtanysh sezimi kerneidi! Muny kórý naǵyz baqyt der edim», - deidi ministr.
Sondai-aq, ol Qazaqstanǵa kelgen Gollivýd akteri Nikolas Keidjge tartý etilgen shapanǵa qatysty ázildiń tarap ketýine pikir bildirdi.
«Bizdiń ulttyq kiimdi kúlki qylǵan qiys kózqarastarǵa qaramastan, Gennadii Golovkin men bizdiń ózge de patriot sportshylarymyz onyń tanymaldylyqqa ie ekenin dáleldep keledi. Biz ulttyq sport túrleri ókilderiniń ekipirovkasyna nazar aýdaramyz. Bul rette Bekbolat Tileýhanǵa zor alǵysymyzdy aitýymyz kerek. Ol tek myqty ánshi ári májilismen ǵana emes, búgingi tańda onyń qatysýymen ulttyq ekipirovka ázirlendi. Ekipirovka sportshylarǵa asa yńǵaily. Kókpardan ótken jyly bolǵan Álem chempionaty kórsetkendei, Ulttyq quramamyz óziniń mánerli kiimimen ózgelerden góri aibyndyraq kórindi», - dedi ministr.
