Belarýs elinde ótken «Slavian bazary» halyqaralyq óner baiqaýynda 1-oryn alǵan Ámireniń prodiýseri Jan Muqanov ánshiniń Tóreǵali sekildi toi ánshisi bolmaitynyn aitty, dep habarlaidy Baq.kz tilshisi.
Prodiýser Ámireni Resei telearnalarynyń birinde ótetin shoýǵa sarapshy retinde shaqyrylǵanyn atap ótti.
«20 jastaǵy jigit ne týraly aita alady? «Slavian bazaryn» jeńgen kúnniń ózinde ol avtomatty túrde sarapshy bola almaidy. Jaýap retinde biz Ámireniń «1 arnadaǵy» shoýǵa qatysýshy retinde bara alatynyn aittyq», - dedi Muqanov.
Qazaqstandyq ánshi aldaǵy ýaqytta jańa obrazben óner kórsetedi. Prodiýseri Ámireniń josparlary týraly da baiandady.
«Onyń jańa obrazda, qazaqstandyq ánshiler arasynda jańa stili bolady. Qandai da bir prototip jasaǵym kelmeidi. Onyń toi ánshisi bolǵanyn qalamaimyn. Shynymdy aitsam, onyń qandai bolýy keregin ózim de bilmeimin», - dep jaýap berdi ol Ortalyq kommýnikatsiialar qyzmetinde ótken baspasóz máslihatynan keiin jýrnalister qoiǵan saýalǵa.
«Ámire toida án aitatyn ánshiniń sanyn bireýge arttyrmai ma?» degen jýrnalist saýalyna Muqanov bylai dep jaýap berdi:
«Onyń Tóreǵali siiaqty bolmaitynyna ýáde beremin. Tóreǵalimen birge múmkin bolatynnyń bárin jasadyq. Al bul joly format basqasha. Tańerteń toi týraly habarlasty. Biz muny talqylaǵan da joqpyz. Daiyn emespiz, qazir eń bastysy toi emes dedik. Qazaqstandyq artister toidan ǵana aqsha tabatyny jasyryn emes. Al biz kontsertten aqsha tabýǵa tyrysamyz», - dep sózin túiindedi ol.
Eske sala ketsek, Jan Muqanov otandyq ánshi Tóreǵali Tóreáliniń de mýzykalyq proiýdiýseri bolǵan edi.
