Biyl Qazaqstan atynan halyqaralyq ABU TV Song Festival án festivaline «Slavian bazary» baiqaýynyń jeńimpazy, «Ámire» laqap atymen tanymal bolǵan ánshi Ernar Sadyrbaev qatysýda, dep habarlaidy "Ult aqparat" «Habar» Agenttigine silteme jasap.
Joba «Habar» Agenttigi múshe bolyp tabylatyn Aziia-Tynyq muhity habar taratý Keńesiniń Bas Assambleiasy aiasynda búgin, 18 qarasha kúni onlain-formatta ótip jatyr.
Festivalge 12 eldiń ókili qatysýda. 2019 jyly Japoniiada ótken ABU TV Song Festival án festivaline Dimash Qudaibergen qatysyp, óz ónerimen kópshilikti tamsandyrǵan bolatyn.
Ámireniń halyqaralyq án festivalinde tanystyratyn «Ómir - teńiz» ániniń jańa beinebaiany álemge aty shyqqan Sharyn shatqalynda túsirildi. Týyndynyń kontseptsiiasy óziniń tereń maǵynasy men filosofiialyq máni jaǵynan kórermenge oi salary anyq.
Ol týraly joba prodiýseri Baqytgúl Tórehan: «Mundaǵy rejisserdiń oiy ol qazirgi kezdegi indetpen adamnyń qiyn sátteri. Kez-kelgen adam qiyn sátterde ózgemen emes, ózimen-ózi kúresedi. Arpalys kezinde bireýler qiyndyqqa tóze almai jatsa, endi biri kersinshe barlyǵyn jeńip shyǵady. Basty keiipkerimiz óziniń jigerliginiń, eńbekqorlyǵynyń arqasynda indet pen qiyndyqtardy artta qaldyryp joǵary shyǵady», - dedi.
Sonymen qosa, «Habar» Agenttiginiń bastamasymen Ámireniń jańa «Ómir - teńiz» áni Eýropalyq habar taratý odaǵy Eýropalyq Mýzykalyq Án jinaǵynyń besinshi shyǵarylymyna enetin boldy. Joba aiasynda qatysýshylar eýropalyq tanymal oryndaýshylarymen birlesip ortaq áleýmettik taqyryptaǵy mýzykalyq jinaq shyǵarady.
Biylǵy án jinaǵy COVID-19 pandemiiasy saldarynan mýzykanyń áserli yqpalymen shyǵý, álemniń qalypty ómir saltyn qalpyna keltirýde optimistik jiger syilaýǵa arnalǵan.
