Amerikalyq Moderna jáne Pfizer kompaniialary COVID-19-ǵa qarsy vaktsinalaryn testileýdiń sheshýshi kezeńine kóshti. Tekserý 30 000 eriktige jasalady, dep habarlaidy Reuters agenttigi.
Sheshýshi kezeńdegi testileý vaktsinanyń qaýipsizdigi men COVID-19-dyń aldyn alatynyn anyqtaýǵa arnalǵan. Eger bári sátti ótse, vaktsina jyldyń aiaǵynda qoldanysqa enýi múmkin.
Dástúrli vaktsina óndirý tásilderimen salystyrǵanda bul vaktsina jyldam daiyndalyp, óndiriletin jańa tehnologiiamen jasaldy. RNQ nemese sintetikalyq RNQ dánekeri immýndyq júiege koronavirýsty tanyp, beitaraptandyrýdy úiretedi.
Buryn sońdy naryqqa vaktsina shyǵaryp kórmegen Moderna kompaniiasy AQSh úkimetinen 1 milliard dollar aldy.
Al Pfizer-de AQSh úkimetimen kelisim bar. Eger vaktsinanyń tiimdiligi dáleldense, olar 2 milliard dollar turatyn 50 million vaktsinany satady.
Qazirgi kúni koronavirýsqa qarsy 150-den astam vaktsina túrli jasalý kezeńderinde jáne jiyrmaǵa jýyq vaktsina adamdarǵa salynyp, tekserýden ótip jatyr.
Johnson & Johnson kompaniiasy osy aptada klinikalyq synaqty bastaidy. Al vaktsinany aýqymdy zertteýdi qyrkúiekte bastaýy múmkin.
Britaniialyq dári shyǵarýshy AstraZeneca vaktsinasyn keń kólemdi synaqtan ótkizý biyl jazda bastalatynyn málimdedi. Bul vaktsina Oksford ýniversiteti zertteýshilerimen birlesip daiyndalyp jatyr.
Óndirýshiler álemge keń tarap jatqan virýsty tezirek jeńýge tyrysyp jatyr. Álemde COVID-19-dan 650 000-ǵa jýyq adam qaitys boldy.
Pfizer-diń málimdeýinshe, synaq sátti ótip, vaktsina qazanda maquldansa, kompaniia jyl sońynda 50 million naýqasqa eki doza kóleminde vaktsina egedi.
2021 jyldyń sońynda Pfizer 1,3 milliard doza alýdy josparlap otyr, al Moderna shamamen 500 nemese 2021 jyldan bastap jylyna 1 milliard dozadan alady.
Reuters-tiń habarlaýynsha, osy aptada amerikalyq birjadaǵy Moderna aktsiialary 9%-ǵa ósken. Pfizer aktsiialarynyń ósimi 1,6%-dy qurady, al onyń vaktsina jasap shyǵarǵan seriktesi BioNTech aktsiialary 4,2%-ǵa ósti.
