© Photo : Operativnyi shtab MChS RK
Qostanai oblysynda órt saldarynan baspanasynan aiyrylǵan turǵyndar úshin 100 sharshy metrlik bir qabatty úiler salynady. Bul týraly Indýstriia jáne infraqurylymdyq damý vitse-ministri Erkebulan Daýylbaev málimdedi, - dep habarlaidy Sputnik Qazaqstan.
Resmi málimetke sáikes, Amanqaraǵai aýylynda 85 úi, al Ozernoe aýylynda 6 baspana janyp ketti. Tehnikalyq tekseriske sáikes turǵyn úiler qaita qalpyna keltirýge jaramsyz.
Qazirgi tańda Áýliekól aýylynda 2 gektar jer telimi bólindi. Ondaǵy ár 8 sotyq jerge jalpy aýmaǵy 100 sharshy metrdi quraityn bir qabatty baspanalar salynady. Bul - aýdan ortalyǵy, sondyqtan úii janyp ketken otbasylarǵa sol jerge kóship barǵan tiimdi. Áýliekólde qajetti infraqurylym bar, áleýmettik-turmystyq maqsattaǵy nysandar da jaqyn.
"Jergilikti merdiger uiymdardy tartý arqyly qurylys-montajdaý jumystaryn bastaidy. Qurylys kezinde tek otandyq ónimder ǵana qoldanylady. Búginde jumysty jedel túrde bastaýǵa tapsyrma qoiylyp otyr. Indýstriia jáne infraqurylymdyq damý ministrligi eki ai ishinde qurylys jumystaryn tolyqtai aiaqtaýdy kózdeidi", – deidi Daýylbaev.
Qazirgi kezde Memleket basshysynyń tapsyrmasy boiynsha tótenshe jaǵdaidyń saldaryn joiý maqsatynda qajetti qarajat bólindi. Buǵan deiin Prezident zardap shekken azamattarmen kezdesip, jańa baspanalar eki-eki jarym aida salynatynyn aitty.
