Almaty oblysynyń ákimi Amandyq Batalov Jetisý jurtshylyǵyn astana kúnimen quttyqtady, dep habarlaidy "Ult aqparat".
"Qurmetti jetisýlyqtar! Barshańyzdy elorda kúnimen shyn júrekten quttyqtaimyn! Tuńǵysh Prezidentimiz – Elbasy Nursultan Ábishuly Nazarbaevtyń kóregen saiasatynyń nátijesinde Eýraziia qurlyǵynyń júreginde teńdessiz qala boi kóterdi, jańa qala batyl sheshimniń, shyǵarmashylyq oidyń, tolassyz eńbektiń júzege asqan jarqyn jemisi boldy" degen aimaq basyshysy IýNESKO-nyń «Álem qalasy» qurmetti ataǵyna ie bolǵan astanamyzdyń halyqaralyq mańyzy bar qala ekenin aitty.
"Elimizdiń áleýmettik-saiasi, ekonomikalyq jáne mádeni ortalyǵyna, sol siiaqty diplomatiialyq, bitimgershilik, halyqaralyq bailanystardy keńeitý máselelerinde jahandyq dialog alańyna ainaldy. Shyraily shahar, eńseli elordamyzdy odan ári damytýǵa Prezidentimiz Qasym-Jomart Kemeluly Toqaev erekshe nazar aýdaryp, ony jan-jaqty jetildirýge tolyq múmkindik jasap otyr. Búginde Nur-Sultan qalasy elimizdiń barlyq aimaǵy úshin ustanar úlgi, baǵyt kórseter qubylnama, ainymas temirqazyq bolýda" - dedi ol.
Amandyq Ǵabbasuly elordanyń damýyna qoldaý kórsetip kele jatqan barlyq jetisýlyqtarǵa alǵysyn jetkizdi.
"Zamanaýi megapolisti órkendetýge barlyq qazaqstandyqtarmen qatar jetisýlyqtar, sizder de zor úles qosyp, bas qalanyń tabystaryna shyn júrekten qýanyp, jetistikterin jetildire túsýge atsalysyp, qazirgi indetpen kúres jaǵdaiynda qoldaý kórsetip, bereke-birlik tanytyp kelesizder. Qurmetti jerlester! Osy merekede sizderge jáne jaqyndaryńyzǵa zor densaýlyq, eńbekte tabys, otbasynda shattyq pen qýanysh tileimin, – dedi aimaq basshysy.
Sóziniń sońyn oblys ákimi: "Ósip, órkendei ber, tól astanamyz – Nur-Sultan qalasy! Gúldenip, dami ber, ortaq Otanymyz – Qazaqstan Respýblikasy!", – dep túiindedi.
