«AMANAT» partiiasy janyndaǵy «Jer amanaty» komissiiasy Jetisý oblysynda boldy. Kóshpeli keńes qorytyndysy boiynsha, óńirde 41 myń gektardan astam jaiylymdyq jer memleket menshigine qaitaryldy, dep habarlaidy "Ult aqparat".
Komissiia músheleri – partiia Hatshysy Dáýlet Káribek, zańger Baqytjan Bazarbek, «AMANAT» partiiasynyń atynan sailanǵan Májilis depýtaty Janarbek Áshimjan, AShM Jer resýrstaryn basqarý komitetiniń tóraǵasy Murat Temirjanov Kerbulaq, Eskeldi jáne Kóksý aýdandarynyń turǵyndarymen kezdesip, jer qatynastary salasyndaǵy ózekti máselelerdi talqylady.
Partiia Hatshysy Dáýlet Káribek atalǵan jumys elimizdiń barlyq óńirinde júrgizilip jatqanyn atap ótti.
«Memleket basshysy Qasym-Jomart Toqaev igerilmei jatqan jaiylymdyq jerlerdi memleket menshigine qaitarý týraly naqty tapsyrma berdi. Prezident aityp ótken áleýmettik ádilettilikti qamtamasyz etý máselesi «AMANAT» partiiasynyń negizgi basymdyqtarynyń biri sanalady. Árbir aýyl turǵynynyń pikirin eskerýge tyrysamyz jáne jaiylymdyq jerler ádil bólinýi úshin barymyzdy salamyz», – dep atap ótti Dáýlet Káribek.
Óz kezeginde, Labazy aýylynyń turǵyny Qizat Abirov búginde jaiylymdyq jerlerdiń tapshylyǵy burynǵydan da kóp sezilip otyrǵanyn aitty.
«Aýylda turyp, mal baǵyp otyrǵandar úshin bul birinshi kezektegi másele. Kóksý aýdanynda 6 myń gektardan astam jer qaitaryldy. Sondyqtan osy komissiianyń jumysyna úlken úmit artamyz», – dep tolyqtyrdy Qizat Abirov.
Esterińizge sala keteiik, partiia janynan «Jer amanaty» komissiiasy qurylǵan bolatyn. Sońǵy birneshe aida komissiianyń kúshimen Qaraǵandy, Jambyl, Túrkistan jáne Aqtóbe oblystaryndaǵy 160 myń gektardan astam jaiylymdyq jer memleket menshigine qaitaryldy.
